تريزيجيه: رجوعي للأهلي كان وعد لوالدتي ورفضت ملايين من أجله

كشف النجم المصري محمود حسن تريزيجيه كواليس عودته للنادي الأهلي، مؤكدًا أن قرار العودة لم يكن ماليًا، بل "قلبه اللي اختار" الرجوع للقلعة الحمراء.

وقال تريزيجيه في حوار عبر برنامج "ملعب أون" مع الإعلامي سيف زاهر: "الكابتن محمود الخطيب كلمني بنفسه، وقال لي: جه وقت ترجع بيتك، كنت وقتها في تركيا، وكان فيه عروض بمبالغ كبيرة جدًا، لكن قلت للنادي التركي: يا الأهلي يا مش هلعب كورة تاني."

وأكد تريزيجيه أنه رفض عرضًا ضخمًا، وكان راتبه المعروض أعلى ثلاث مرات من عرضه في الأهلي، سواء من أندية خارجية أو داخلية، لكنه اختار الأهلي عن قناعة تامة: "الفلوس مش كل حاجة أنا مشجع للأهلي من قبل ما أكون لاعب."

وعن محاولات سابقة للانتقال للأحمر، قال: "في كل فترة انتقالات، مكنش بيحصل تفاوض.. لكن لما الخطيب كلمني وفتح باب الرجوع، كان عنده رغبة حقيقية، قعدت معاه في بيته، وكان اللقاء مؤثر جدًا."

وتطرّق تريزيجيه إلى واقعة مفصلية في مسيرته، حين كان قريبًا من الانضمام لنادي إيفرتون الإنجليزي بطلب من المدرب كارلو أنشيلوتي: "كل حاجة كانت خلصانة، لكن جالي إصابة في الرباط الصليبي وقتها.. الحمدلله على كل حال."

وعن المنافسة داخل الأهلي، قال: "أنا طلعت الفريق الأول وأنا عندي 17 سنة، وكان في مكاني أبو تريكة ونجوم كبار. بس دي متعة الكورة، إنك تتحدى وتحارب وتساند زميلك لو هو الأحق بالمشاركة."

وتحدث عن الفرق بين الجيل الحالي والجيل السابق: "زمان كنا من البيت للنادي وبس لا سهر ولا خروجات، الالتزام هو اللي بيفرق بين لاعب والتاني على المدى البعيد، وده أسلوبي من أول يوم."

اختتم تريزيجيه حديثه بكلمات من القلب عن والدته الراحلة: "كان نفسي أمي تشوفني في الأهلي من تاني، كانت بتحلم بده ربنا يرحمها."