لميس الحديدي توجه رسالة مهمة للحكومة والتجار بعد رفع أسعار المحروقات

بقول للحكومة فكروا في "موازنة المواطن" عند اتخاذ قرار.. وللتجار "بلاش تبقوا انتم والزمن على الناس"

أكدت الإعلامية لميس الحديدي، أن رفع أسعار المحروقات الأخير له تأثيرات مباشرة وغير مباشرة على أسعار السلع وخدمات النقل، لكنها وجهت رسالة واضحة للحكومة، داعية إلى وضع موازنة المواطن في الاعتبار في ابواب الاصلاح الاقتصادي وضبط الموازنة 
وقالت خلال تقديمها برنامج "كلمة أخيرة" على شاشة ON:"وانتم بتظبطوا الموازنة، ومع اقتراب الموازنة الجديدة في يوليو، اللي فيها زيادات في المرتبات والمعاشات، فكروا في موازنة المواطن الشخصية. برنامج الإصلاح الاقتصادي مهم، لكن في أبواب تانية نقدر نبدأ بيها قبل الدعم، خاصة إن الدعم لا يمثل إلا 11% من الاستخدامات، وهو رقم ضعيف جدًا."
وتابعت:"الاستثمار الحكومي، والإنفاق، والمديونية، كلها أرقام أكبر بكتير. أرجوكم، فكروا في المواطن وأنتم بتاخدوا القرارات. الأمور بقت صعبة جدًا."
كما وجهت رسالة إلى التجار، قائلة: "بوجه رسالة للتجار بعد مناشدة الحكومة... انتم عارفين إن في تراجع في القوة الشرائية، بلاش تبقوا انتم والزمن على الناس. اقفوا جنبهم، لأن لو الناس بطلت تشتري، الضرر هيجيلكم أنتم كمان."
وأضافت:"متفكرش كتاجر في المكسب اللحظي... فكر إنك عاوز زبونك يفضل معاك، وإنك تبيع بشكل مستمر. لو هتزود، زود في أضيق الحدود، ولو تقدر تمتص الزيادة الأخيرة، اعمل كده... حتى لو شلت نص التكلفة، وحملت الناس نص."
واختتمت حديثها برسالة إنسانية قالت فيها:"مش عاوزين ركود، ومش عاوزين قفزات جديدة في التضخم. إحنا عايزين اقتصاد نقدر نشم نفسنا فيه شوية."