أزمة جديدة هزت الوسط الفني والسبب «بوسه»

علقت الإعلامية سارة نخلة، على تصريحات المخرج هادي الباجوري، الذي أشار فيها أن القبلة في الأفلام “مش عيب”، مؤكدة أن هذا الرأي يتجاوز القيم والمبادئ الراسخة في المجتمع.

وقالت سارة نخلة، عبر يرنامجها آخر اليوم، على قناة هي، «إزاي تستهين بالقيم والمبادئ اللي مجتمع كامل متربي عليها بالشكل ده؟ يعني حضرتك شايف إن تعليم ولادنا إن البوسة بين اتنين مش متجوزين حاجة عادية؟ الكلام ده مش مجرد رأي، ده اعتداء واضح على قيم وأخلاق مجتمعنا».

تابعت: «السينما النظيفة مش مجرد شعار فاضي، دي محاولة لتقديم فن يحترم مشاعر وأفكار الجمهور. لما تقول ‘مبتستحماش يعني؟’ ده كلام مستفز وتجاوز لكل الخطوط الحمراء. السؤال هنا: مين إداك الحق إنك تطلع تشكك في حاجة تمثل احترام لعاداتنا وتقاليدنا؟».

أشارت سارة نخلة، في حديثها على أهمية التوازن بين حرية التعبير واحترام القيم المجتمعية، مشيرة إلى أن الفن وسيلة تأثير قوية، ويجب أن يكون رسالة هادفة. 

وأضافت: “كتير بيتكلموا عن حرية التعبير، بس الحرية دي عمرها ما كانت تبرير للإساءة أو الاستفزاز. لما تطلع تقول: ‘ليه نعلم أولادنا إن البوسة عيب؟’ أنت مش بتتكلم عن حرية الإبداع، أنت بتتكلم عن حرية هدم القيم”.

وختمت سارة نخلة حديثها بتوجيه رسالة مباشرة لهادي الباجوري قائلة: “يا أستاذ هادي، لو عندك مشكلة مع القيم اللي مجتمعك متربي عليها، مفيش حد أجبرك تلتزم بيها، لكن ماينفعش تطلع تهاجمها بالشكل ده. اللي قلته مش رأي ولا إبداع، ده استهزاء واستخفاف بعاداتنا وتقاليدنا، وده شيء مرفوض تمامًا”.