ليه الشخص لما ينجح بيبقى عنده نقص، كزبرة يرد على محمد رمضان

رد الفنان أحمد بحر الشهير بـ "كزبرة"، على سخرية الفنان محمد رمضان، منه بالأمس، عبر حسابه الرسمي على موقع تبادل الصور والفيديوهات الشهير "إنستجرام".

واستخدم كزبرة، خاصية "الاستوري"، وكتب خلالها :"كلام مهم، أول حاجة الحمد لله على نعمة ربنا عليا وحبكم ورسائلكم الجميلة اللي بتوصلني ورد الفعل الجميل منكم على فيلم الحريفة 2، كلام كتير نفسي أقوله وأعبر بيه ليكم".

وتابع كزبرة، قائلًا :"والله يا جماعة الكلام ده نفسي أقوله من بدري بس حاسس أن وقته، أنا مش عارف ليه كل ما أنجح في ناس بتحاول تطلع صورتي وحشة، أنا بجد نفسيًا مبقتش قادر وبقالي فترة كبيرة كل لما أعمل حاجة حلوة مبقتش عارف أتبسط بيها ونفسيًا مش أحسن حاجة، وربنا اللي عالم الواحد كل اللي يهمه أنه يقدم حاجة تعجبكم وتسعدكم".

وأضاف كزبرة، قائلًا :"بس في ناس بتتعامل مع اللي بيقدم حاجة كوميدية على أساس أنه شخص تافه مش موهوب، والواحد عشان بيتعامل بطبيعته ومش بيتصنع بتحاولوا تشوفوا إزاي تطلعوا في عيب قدام جمهوره وإخواته اللي بيحبوه".

وأوضح كزبرة، قائلًا: “زي ما بيتنسبلي كلام مقلتهوش أو يتقلل مني بحاجات قديمة عملتها وأحيانًا بتوصل للتريقة على اسمي بمجرد ما يعمل حاجة حلوة وتعجبهم، أنا مش عارف ليه وده السبب اللي بيخلي إنسان طيب أول ما ينجح يتحول لإنسان عنده نقص وعنده حرب مع كل اللي حوليه، زي ناس كتير نجحت وبقوا يتعاملوا بنرجسية عشان يعرفوا يتعاملوا مع الواقع”.

وأكمل كزبرة، قائلًا :"أنا يا جماعة مش عايز أوصل للمرحلة دي، أنا عايز أبقى إنسان طيب وفي حالي واشتغل على نفسي وأقدم لكم فن يعجبكم ويبسطكم، هو ده هدفي فبلاش تتعاملوا مع الواحد بأسلوب هو مش حابه، وشكرًا لكل واحد بيدعمني من قلبه وأي حد بيحب اللي بقدمه أو حتى بينقده بأسلوب كويس، أنتم اللي تهموني وشكرًا".

وأختتم كزبرة، قائلًا :"في الآخر في قصص نجاح ملهة كتير تستاهل الناس تتكلم عنها ممكن تفيد الناس أكتر من قصة أحمد بحر كزبرة، وإزاي وصل لهنا، وهكون أسعد كتير لو كان التركيز على شغلي مش على شخصي، سواء بالإيجاب أو بالسلب علشان أتعلم وأطور نفسي في اللي جاي".

محمد رمضان يسخر من كزبرة

وكان محمد رمضان، سخر من كزبرة، بالأمس عندما تساءل عن حقيقة الخلاف بينهما على هامش حضوره لمنتدى تغير المناخ.

وقال محمد رمضان، ردًا على السؤال “إحنا في مكتبة محترمة، إحنا مش في محل عطارة هنا”.

ومن جانب آخر، يعرض حاليًا لـ كزبرة، فيلم "الحريفة 2"، في دور العرض السينمائي، واستطاع تحقيق نجاحًا كبيرًا خلال الـ 72 ساعة الأولى من طرحه.

وحقق فيلم "الحريفة 2"، خلال أول 3 أيام من عرضه، إيرادات تخطت الـ 21 مليون جنيه، لينتزع صدارة شباك تذاكر السينما من فيلم "الهوى سلطان"، الذي لم يتنازل عنها منذ طرحه في مطلع نوفمبر الماضي.

أحداث فيلم الحريفة 2

فيلم “الحريفة 2”، تدور أحداثه استكمالًا للجزء الأول، حول استمرار ماجد، مع أصدقائه وزملائه في خوض المزيد من التحديات والمغامرات المثيرة من خلال ممارسة لعبة كرة القدم، كما تشهد حياتهم الشخصية المزيد من التطورات والتغيرات المختلفة.

أبطال فيلم الحريفة 2

فيلم “الحريفة 2”، بطولة الفنان نور النبوي، أحمد غزي، نور إيهاب، خالد الذهبي، أحمد بحر الشهير بـ "كزبرة"، دونا إمام، عبدالرحمن محمد، فراس سعيد، ريما مصطفى، كريمة منصور، سليم هاني، تأليف إياد صالح، إخراج كريم سعد.