أحمد التهامي: «الزعيم بيهتم بكل تفصيلة واتعلمت منه الاحترام والالتزام»

أعرب الفنان أحمد التهامي، عن سعادته العارمة بالتعاون مع الزعيم عادل إمام في أكثر من عمل فني سواء في السينما أو التلفزيون أو المسرح خلال مشواره في التمثيل، واصفًا نفسه بـ «المحظوظ».

وقال «التهامي» في تصريحات خاصة لـ «الجمهور»: «شغلي مع الزعيم بعتبره عوة أم ليا.. وفضل كبير من ربنا إني اشتغلت مع عادل إمام في كذا عمل، وأنا أعرفه أكتر من 23 سنة بداية من أمير الظلام، فعلاقتي بيه كبيرة جدًا وقوية، وكنت محظوظ إني اشتغلت معاه مسرح، والوقوف على المسرح مختلف معاه جدًا».

«عادل إمام قيمة كبيرة»

وكشف كواليس التعاون مع عادل إمام، قائلًا: «عادل إمام قيمة كبيرة وبيحتضن الممثل وبيحب كل الناس اللي حواليه، وحتى لو الفنان اللي معاه دوره صغير أو بيقدم مشهد واحد بيبقى عاوز يخلي المشهد ده أعظم حاجة في حياته، وبيتهم بكل صغيرة وكبيرة وبيحب كل الممثلين تطلع أجمل ما عندها في العمل معاه».

أما عن الخبرات التي اكتسبها من الزعيم، قال: «اكتسبت من أستاذ عادل حاجات كتيرة جدًا مهما اتكلمت عنها مش هقدر اسردها في لقاء واحد ، على المستوى المهني إن الفنان لازم يحب شغله ومادم وافق على دور يبقى يذاكره كويس ويديله كل ما يملك، ويحترم شغله وزمايله، كل ما تحب شغلك وتديله أكتر هتلاقي حب الناس والجمهور، وأهم حاجة إن الناس يكون عندها ثقة في اللي بتقدمه، لإنهم بيحكموا على الممثل من خلال العمل أو الأدوار اللي بيقدمها، ولازم كل دور يعلم مع الناس».

مسلسل «الليلة كبيرة»

على صعيد آخر، يشارك الفنان أحمد التهامي في مسلسل «الليلة كبيرة»، مع عدد كبير من عملاقة الكوميديا في مصر، منهم الفنانة هالة فاخر، والفنان سليمان عيد.

والمسلسل ينتمي إلى نوعية الأعمال القصيرة المكونة من 15 حلقة منفصلة، وتدور أحداث المسلسل في إطار كوميدي اجتماعي، ومن المنتظر عرضه عبر إحدى المنصات الرقمية.

ويضم «الليلة الكبيرة» باقة مميزة من كبار النجوم، وهم: هالة فاخر، سليمان عيد، محسن منصور، حجاج عبدالعظيم، أحمد التهامي، عبدالرحمن ظاظا، اسماعيل فرغلي، مدحت تيخا، ساندي مراد، محمد يوركا، محمد طعيمة، لؤي شوكت، زينة منصور، حمدي هيكل، مصطفى يوسف، محمود فايز، نشوى بلال، وهو من تأليف ورشة حروف، وإخراج وسام المدني.