هدى هاني تكشف حقيقة احتكار محمد صبحي لتلاميذه في المهنة

كشفت الفنانة هدى هاني حقيقة احتكار الفنان محمد صبحي لفناني مسلسل «يوميات ونيس» قائلة: «أكبر دليل أنا مش هدافع عن استاذي لأن هو اللي علمني لكن أكبر دليل أني عملت اكتر من 20 مسلسل وكان ليا كذا محطة نجحت فيهم منهم العطار والسبع بنات، العائلة والناس مع المخرج محمد فاضل، العار مؤخرا».

وعن حديث الفنانة عبير صلاح الدين، بشأن احتكار محمد صبحي لها، قالت هدى هاني خلال حوارها مع الإعلامية انجي هشام في برنامج «المنسي» عبر قناة «هي»: «مش هتكلم عن عبير صلاح الدين، واللي قالته، لكن في نجوم كتير وسوبر ستارز كان محمد صبحي اللي حاطط حجر أساسهم، واكتشفهم منهم منى زكي، هاني رمزي، مصطفى شعبان أسماء كبيرة وكتيرة».

وأضافت: «المشكلة أننا لما بنرتبط بأستاذ محمد صبحي بيبقي ليه طريقة معينة هو ليه طريقته وبيئته، بيبقى صعب لما تخرجي تتأقلمي مع شكل اخر احنا مش بنبقي عارفين نتأقلم لكن هو عمره ما منع بالعكس أنا لما بيشوفلي عمل بيكلمني وبيقولي برافو عليكي إنما عمره ما قالي ايه اللي انتي عاملاه ده؟»

وتابعت: «هو مطلع كويس وبيشوف كل واحد فينا بيعمل ايه، لكن بيبقي غيور علينا وزي الأستاذ مع تلميذة مش عايزة يضل الطريق».

وكشفت الفنانة هدى هاني، عن سر علاقتها الوطيدة بالفنانة الراحلة سعاد نصر قائلة: «احنا لينا ذكريات معاها من ايام المسرح كنا ورا الكواليس بنقرأ القرآن قبل ما نتدخل ، كانت أمي في الهمجي وأمي في المسلسل، كانت أم فعلا بتخاف علينا متدخلة في خصوصيتنا ومذاكرتنا وادتنا نصائح كتير وتوصيات كتير لسه محافظة عليها لغاية دلوقت وهي اللي علمتني الصلاة».

وأضافت هدى هاني خلال حوارها مع الإعلامية انجي هشام في برنامج المنسي عبر قناة هي: لما اتجوزت جاتلي البيت وكانت اكتر واحده ليها صلة بيا بحكم أن عمتي الفنانة هناء الشوربجي.

وتابعت: «احنا اتهزينا جدا بموتها والمسلسل اتأثر كتير بموتها».