لقاء سويدان تروى تفاصيل خلافها مع ميدو عادل: أنا عندي صور وفيديوهات

تحدثت الفنانة لقاء سويدان أثناء حلولها ضيفة على بودكاست "Restart" عن تفاصيل خلافها مع الفنان ميدو عادل أثناء تقديمهما مسرحية سيد درويش.

مسرحية سيد درويش وخلاف ميدو عادل

وقالت عن خلافها مع ميدو عادل: "هرد وباختصار لأن الموضوع أخد أكبر من حجمه من ناحية إني ممثلة مسرح وكنت الأولى على دفعتي لمدة أربع سنوات واشتغلت مع أعظم نجوم مصر في السينما والمسرح والتلفزيون من أول سعاد حسني وأحمد زكي مروراً بأكبر نجوم موجودين أو توفوا".

وأضافت: “والفترة دي الحمد لله دي كلها اتربيت على حاجات معينة وأساسيات مقدرش أغيرها بمعنى مقدرش أكون في مكان وحاسة أن المسرح بيتهان يعني لما نطلع نحيي الجمهور بشورتات يبقى كدا بنهين المسرح وبنهين الناس لما نجيب أطفال نطلعهم في مشهد لا يصح ولا يليق بالأطفال يبقي كدا بنهين الطفولة”.

وتابعت: "لما تكون بتمثل فترة زمنية بتاعة سيد درويش سنة 1919 ناس بفساتين مودرن وكوتشيات يبقي إحنا كدا بنهزر"، موضحة: "كان عندي مشكلة وتحفظات على أكتر من حاجة ومشكلة مع المخرج وأحد المخرجين المنفذين وميدو لأني اعترضت بشكل كويس أول مرة وتاني مرة وتالت مرة".

وأضافت: “لقيت مفيش أي استجابة وأنا كواحدة عارفة يعني إيه التزام ويعني إيه رولز تقدمت بشكوى للأكبر مني سلطة محصلش فصل فيها وتقدمت للشئون القانونية والكلام دا كان من يوم 16/8/2023 والشكوى أحيلت إلى الشؤون القانونية يوم 26/8 والمشكلة حصلت يوم 23/9”.

وذكرت: "يعني فيه شهر قبل المشكلة ومشاكل وحاجات كتير جدًا أنا مقدرش أطلع فيها لأننا مش في خناقة في شارع والبني آدم يرد بقدره يعني لما حد يشتمني أنا مش هرد زي الحد دا ما عمل أنا هرد بقدري".

سبب صفعها لميدو عادل

وكشفت عن سبب صفعها لـ ميدو عادل، قائلة: "أنا لم أصرح بدا اللي قال هو الطرف الآخر  وقال حاجات كتير قوي
أنا مقدرش أتكلم على أي حاجة فيها غير قدام النيابة الإدارية ونقابة الممثلين ولما الموضوع تطور اضطررت إلى اللجوء إلى النيابة العامة لأن فيه حاجات لن أتهاون فيها، والرد قصاد اتهام دا في الشارع".

وأوضحت: "أنا عندي كل ما يثبت كلامي من صور وفيديوهات وشهود يثبتوا كلامي وعندي أدلة كتير جدًا مينفعش أخرجها السوشيال ميديا، لأني لجأت للقانون وحذرت كتير وقولت يا جماعة مينفعش كدا وإن عودتم عودنا والمخرج قال دي رؤية مخرج ولو دي كانت رؤيته مكنتش وافقت عليها من الأول لأن كان بقالها 4 سنوات ناجحة ومينفعش أشوف ناس بتحط تراب على الطبق اللي هتاكل منه وأقول دا هزار أنا اشتغلت مع أعظم النجوم في المسرح مع الأستاذ نور الشريف عمري ماشوفته بيقول أنتم كذا وأنا النجم، ماكنش الأستاذ نور كل يوم يعملنا اجتماعات وكل يوم ألاقي كلام جديد على المسرح بيتقال وتجاوزات أنا مقبلهاش".

وتابعت: "حكاية الأطفال المعاقين دي حاجة لا يقبلها الله من فوق سبع سموات ودي حاجة عيب وأتحدى أي صورة أو فيديو إني بتعامل بشكل وحش مع الأطفال لما كانوا على المسرح والناس كلها كانت بتصور طلعولي صورة من موبيلاتكم إني عملت كدا"، مشيرة: "لو أنا شيطان بقرون وديل مش هعمل كدا مش بعمل كدا بيني وبينهم يبقى هعمل كدا قدام الجمهور".

واستكملت: "أنا لما جالي برنامج أول حلقة عملتها في برنامجي كانت عن ذوي الاحتياجات الخاصة ونشاطاتي في الموضوع دا بقالها سنين، وأن دا يحصل دا معمول بقصد، علشان تصدر صورة سيئة عني أنا بقالي 39 سنة بشتغل ومفيش حاجه هتهدني بالسهولة دي".

الجمهور، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة المصرية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار، الاقتصاد، حوادث وقضايا، تقارير وحوارات، فن، أخبار الرياضة، شئون دولية، منوعات، علوم وتكنولوجيا، خدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.