«أمهات مصر» يوجهن رسالة لأبنائهن قبل إعلان نتيجة الثانوية العامة

وجهت عبير أحمد، مؤسس إتحاد أمهات مصر للنهوض بالتعليم، وإئتلاف أولياء الأمور، رسالة ومنشور لأولياء الأمور، قائله: "قبل نتيجة الثانوية العامة.. ايه الرسالة اللي تحبي توجيها لأبنك أو بنتك قبل النتيجة".

وانهالت التعليقات من جانب أولياء أمور طلاب الثانوية العامة، علي صفحة اتحاد أمهات مصر للنهوض بالتعليم، عبر موقع التواصل الاجتماعي "فيس بوك"، حيث قالت ولي أمر موجة حديثها لابنها: "ربنا وضعلك طريق والأب والأم قاموا بتمهيد الطريق وانت عليك أن تمشي في الطريق باستقامه علشان توصل بالسلامة".

وأضافت ولي أمر أخرى: "عملت اللى عليك وزيادة وأي مجموع انا فخورة إنك ابنى، واتمنى كل أم يكون معها ابن زيك يا عمرى، ربنا يجبر بخاطرك ويراضيك ويكرمك على قد كرمه ويسعدك دنيا وآخره ودايما تكون بار بيا، بحبك قد الدنيا وما عليها".

واستكملت ولي أمر أخرى: "هقول لابني انا فخوره بيك مهما كانت النتيجة انت تعبت وبذلت مجهود كبير، إن شاء الله ربنا يجبر بخاطرك ويفرحني بيك يا حبيب قلبي".

وذكرت أخرى: "ربنا يكرمك يا ابني، عملت اللي عليك واكتر مهما كان مجموعك انت بطل والله وبإذن الله ربنا هيجبر بخاطرك ولا يضيع تعبك".

وقالت ولي أمر: "انا فخورة بيك في كل الأحوال وعارفة انك عملت اللي عليك وزيادة كمان، ولذلك عندى يقين بجبر خاطرنا من ربنا وبمجموع كبير كمان، وفي كل الأحوال هنسجد لربنا ونشكره وبرضو هنطلع حاجة لله".

وأضافت أخرى: "ربنا يراضيكي ويجبر بخاطرك يا بنتي انتي واللي زيك ويدخل الفرح بيتي يارب، اقولها انا راضية بقضاء ربنا ايا كان هي إيه ربنا كاتب لينا أي حاجة خير، طبعا انتي عملتي اللي عليكي انا فخورة بيكي أيا إن كانت النتيجة، كفاية مراحل الامتحانات اللي مريتي بيها تعب ومرض وعديتي بفضل الله كله خير يارب".. وذلك حسب تعبيرهم