دفاعاً عن بسنت النبراوي| سارة نخلة: "الخمرة لو مش حرام كنا شربناها"

قالت الفنانة سارة نخلة، إن بسنت النبراوي كانت ضيفة برنامجها وتحدثت خلال الحلقة عن المساكنة قبل الزواج وهي لم تتدخل وتشارك في الترند احترامًا للضيفة.  

وأضافت "نخلة"  من خلال حسابها الشخصي بموقع التواصل الاجتماعي "فيسبوك" أن سؤال المساكنة كان سؤالها وفي برنامجها ومع ذلك هي تشاهد في صمت، ولم تفعل ما فعلته الإعلامية دعاء فاروق.

وتابعت: "المذيعة دعاء اللي طالعة تنتقد وتهاجم من غير ما حتى تعذب نفسها وتتفرج على الحلقة، كل إلى شافته خبر خبرين تلاتة مكتوبين إن بسنت النبراوي قالت ممكن أعمل مساكنة لو مش حرام".

واستكملت: "الأستاذة دعاء قرت الخبر وقررت إنها تهاجم وتركب تريند حتى قبل ما تشوف الحلقة وقال إيه إنتو بتتكلموا عن المساكنة كدا عادي؟!، طيب حضرتك إتفرجي الأول شوفي قولنا إيه، ولا في موجة وفي تريند الحق نفسي وأعلق بسرعة".

وأردفت أن الإعلامي تامر أمين تحدث أيضًا عن الموضوع، وقام بالهجوم عليها دون مشاهدة الحلقة وأنه يعرفها جيدة على المستوى الشخصي لذلك يجب عليه تحري الدقة قبل التحدث.

واختتمت: "حق الرد هايكون في حلقتي يوم السبت إن شاء لله، على كل من يتطاول ويهاجم بدون أي سابق معرفة عن اللي بيحصل، وعلى فكرة الخمرة لو مش حرام كنا شربناها، ولحم الخنزير لو مش حرام كنا أكلناه، بس الحرام الأكبر إنك تغتابي حد، وتهاجمي حد وإنتي أصلا مالكيش حق، حضرتك ست محجبة وعارفة الحلال من الحرام يبقى ندخل نتفرج ونتحرى الدقة بعدين نعمل لايف نهاجم فيه زميلتنا اللي هي أنا وطالما حضرتك قلبك على الإعلام وخايفه عليه مني ومن أسئلتي بحب أقولك هناك من هم أحق بالمهاجمة دي، في مذيعات بتعلم الستات تبقى معندهاش كرامة وبتعلمها إزاي تبقى سجادة تحت رجلين جوزها يدوس عليها ساعة ما يحب، ليه حضرتك ماتكلمتيش وانتقدتي وهاجمتي؟، أنا عارفة ليه ومش هاقول دلوقتي إستنيني يوم السبت بحق الرد إن شاء الله".