المخرج أحمد نور: ياسمين صبري دمها خفيف ومحمد إمام رفع مستواها الفني

أكد المخرج أحمد نور، أن الفنانة ياسمين صبري تمتلك طاقة كوميدية على مستوى عالٍ، مشيرًا إلى أنه إذا تعاون معها في عمل فني سيستطيع أن يخرج منها الكثير، ويضيف إلى أدائها الفني.

وقال «نور» خلال ندوته في موقع «الجمهور»: «لو اشتغلت مع ياسمين صبري ممكن اطلع منها حاجات كتير، خاصة في الكوميديا».

وأوضح أن ياسمين صبري استطاعت أن تحقق نجاحًا كبيرًا عندما تعاونت مع الفنان محمد إمام، معلقًا: «ياسمين لما اشتغلت مع محمد إمام في آخر فيلمين كانت متفوقة زي محمد في الكوميديا بالظبط عشان مستوى محمد عالي أوي فبياخد اللي معاه ويرفعه، دايمًا الممثل الكويس بيشيل اللي معاه».

وأردف: «زي فتحي عبد الوهاب وحنان ترك أي حد يقف قدامهم حتى لو مبيعرفش يمثل، هيلاقي نفسه بيمثل لوحده، لأنهم  بيساعدوا أي حد إنه يرتقي بمستواه شوية».

ياسمين صبري لديها طاقة كوميدية عالية

وأشاد أحمد نور بموهبة ياسمين كثيرًا، قائلا: «ياسمين دمها خفيف جدا في الحياة العادية وعندها طاقة كوميدية عالية جدا.. أنا شوفتلها حلقة مع إسعاد يونس كان دمها خفيفي ومقبولة جدًا».

 وعن الانتقادات التي توجه إلى ياسمين بشأن اعتمادها الكلي على جمالها، قال: «إن أنت تكون عندك جمال من عند ربنا دي موهبة في حد ذاتها.. وياسمين ربنا أدها الجمال وخلاها في الصف الأول ومهمتها أنها تقوم من نفسها فنيًا».

واستطرد: «زي مثلا إيناس الدغيدي لما اختارت أحمد عز نجم عنده كاريزما وأسندت ليه بطولة مذاكرات مراهقة ولكنه ماكنش ليه خبرة فنية، ولما بقى عنده مخزون فني بقى مطلوب لأنه بيجمع بين الجمال والموهبة».