نجل عدوية: «محمد رمضان موهوب.. وبحضر لعمل مع والدي»

أعرب الفنان محمد عدوية عن سعادته بردود أفعال الجمهور على أغنيته الأخيرة “قبطان سفينتي”، وكشف عن أعماله الغنائية التي يستعد لطرحها خلال الفترة المقبلة.

وقال الفنان محمد عدوية خلال مكالمة هاتفية ببرنامج “فري تايم”، الذي تقدمه الإعلامية يارا أحمد ويعرض على قناة هي، يوم الجمعة من كل أسبوع.

وقال محمد عدوية لـ"يارا أحمد" عن ردود الأفعال: “الحمد لله الواحد بيجتهد ويعمل اللي عليه وبيعمل حاجة جديدة وفي الآخر بيستنى رد فعل الناس، والحمد لله في ردود فعل حلوة بس أنا مبحبش أتكلم على الكلام ده وأخلي الناس هي اللي تحكم”.

وبسؤاله عن تعليق أحد المتابعين له إنه بعيد عن التريند، قال: “أنا بحب دايمًا أعمل مختلف ومبيهمنيش اللي هو هيعمل إيه وبحب أعمل حاجة تعيش”.

وعن الدويتو الغنائي الجديد الذي سيقدمه مع والده الفنان أحمد عدوية، قال: “ده الأستاذ الكبير بتاعنا ده الأسطورة، بنعمل حاجة بس لسه بنشوف الكلام بتاعها اللي هيليق وبنشوف اللحن لسه تحت ورشة عمل”.

وعن أكثر شيء تعلمه من والده، أوضح قائلًا: “إبقى نفسك وخليك نفسك أهم حاجة تبقى أنت ليك الهدف والحلم بتاعك اللي إنت مقتنع بيه مش مهم هيعمل إيه ومش مهم هينجح بإنهي طريقة مش مهم هيوصل لغاية فين إنت تصدق حلمك أهم حاجة، متابعًا: ده التارجيت بتاع الأستاذ طول عمره كان هو لما طلع في وسط السبعينات والستينات كان في العمالقة طبعًا الأستاذ عبد الحليم والسيدة أم كلثوم طلع هو بلون مختلف وفضل وراه لغاية مابقى أحمد عدوية”.

وعن تجربته برفقة والده أحمد عدوية ومحمد رمضان، قال: “محمد ممثل موهوب جدًا ومجتهد بصراحة مجتهد جدًا وربنا يوفقه، وطبعًا كانت حاجة حلوة جدًا وكانت خطوة جميلة إن إحنا التلاتة نجتمع في عمل واحد لإن من حسن حظي إني أبقى مع أبويا الأسطورة بتاع الغناء الشعبي ومعايا محمد رمضان طبعًا رمضان ربنا يحفظه بني آدم بردو مجتهد جدًا فكانت حلوة طبعًا وربنا وفقنا فيها”.

وعن أعماله المقبلة قال عدوية: “بحضر لأغنية تانية بس نخلي دي بس تاخد وقتها شوية أنا بحب أدي كل حاجة حقها في السمع مش مستعجل على إنها تتسمع بسرعة أهم حاجة تاخد وقتها في سمعها”.

برنامج "free time" تقدمه الإعلامية  يارا أحمد والإعلامية نسمهار الصغير على شاشة قناة هي يوم الجمعة في الساعة الخامسة مساءً وتستضيف من خلاله عددًا من نجوم الفن وتناقش أهم القضايا المطروحة بين الجمهور.