محمود العسيلي: «ألحن لأي حد أنا متصالح مع نفسي»

كشف الفنان محمود العسيلي، عن سبب وصفه لفنانة لبنانية بأنها "كارتة وخنفة"، من خلال حسابه على موقع التدوينات الصغيرة إكس.

وأكد محمود العسيلي خلال لقائه في برنامج "حبر سري" الذي تقدمه الإعلامية أسما إبراهيم ويُعرض على قناة القاهرة والناس، أنه كتب هذه التغريدة لأن هذه الفنانة أهانت مصر وتعالت عليها وعلى الشعب المصري، وعفا الله عما سلف.

وقال محمود العسيلي خلال حبر سري: "خلاص عفا الله عما سلف، لكن هي وقتها بتشتم في مصر، فيه كتير بيكبروا على مصر مرة واحدة، مش عارف إيه اللي بيحصل فجأة، فيه ناس كده بتنسى نفسها، هي كبرت على مصر وبصراحة هي مش بتعرف تغني أوي، أنا اتعصبت وقتها، والناس اتهمتني إني متنمر علي الناس اللي شعرها أكرت، والحقيقة إني أنا أكرت وأقرع كمان، قبل ما أكون أقرع كنت أكرت، معنديش مشكلة في الموضوع لإني متصالح مع نفسي".

وأضاف محمود العسيلي: "من الحاجات اللي اتعلمتها إن مش أي حاجة ينفع تقولها، ومن وجهة نظري إنها مش بتعرف تغني أوي، على قدها بس نجاحها لأسباب أخرى ممكن عشان بتعرف ترقص، ممكن عشان التطور والتكنولوجيا، خلي بالك التكنولوجيا بتفرق كتير أوي أوي، يعني التكنولوجيا بتخلي لو حد مايعرفش يغني يبقى بيغني مظبوط، و ده بيحصل كتير جدًا في حاجة إسمها الأوتو تيون، لو انت منشذ بيدخلك في السلم الموسيقي مظبوط، فيه ناس كتير بتكون نشاذ طول الوقت، الأوتو تيون بيرجعهم لصوابهم، فلما بتكون أغنية متسجلة هيكون الصوت كويس، لكن اللايف هو اللي بيبين الفضايح دي، و ده حال ناس كتير".

وعن اعتذار هذه الفنانة اللبنانية للشعب المصري، وظهورها مرة أخرى في مصر وإحيائها حفلات، قال العسيلي: "أهلًا وسهلًا، أنا معنديش ضغائن مع أي حد، وممكن ألحن لها في يوم، لإني متصالح مع نفسي جدًا، أعمل لأي حد يقصدني في الفن لحن، معنديش مشكلة مفيش حد ممكن مش ألحن له أبدًا".