كاملة أبوذكري تعتذر لـ«سماح أنور»: «أسفة لآخر يوم في حياتي يارب أعوضك»
![سماح أنور وكاملة أبوذكري سماح أنور وكاملة أبوذكري](https://media.algomhor.com/2023/12/large/1716644650128202312161131313131.jpg)
سماح أنور وكاملة أبوذكري
رحاب عنتر
وجهت المخرجة كاملة أبو ذكري رسالة اعتذار للفنانة سماح أنور، بسبب حذفها لدورها في فيلم «يوم للستات» بعد تصويرها جميع المشاهد.
وقالت أبو ذكري خلال برنامج «حبر سري» للإعلامية أسما إبراهيم، الذي يُعرض على قناة القاهرة والناس: «عايزه أقول لسماح أنور عندك حق تزعلي مني و أنا لو مكانك هعمل اكتر من كده، وأنا مش هبرأ نفسي لأ أنا غلطانه فأنا أسفة، انتي ممثلة كبيرة، بصراحة هي ليها حق تكرهني حاولت أبرر، بس هي مش هتسمعني و عندها حق».
![](https://media.algomhor.com/ArticleUpload/2023\12\16\310344_original_1716_113008.jpg)
كما روت المخرجة كاملة أبو ذكري المشكلة قائلة: «هما كانوا خمس مشاهد صامتين، فكنت عايزه أجيب حد جديد عشان يقبل يحلق شعره، فإلهام شاهين قالتلي إيه رأيك سماح أنور تعمل الدور، قولتلها ياريت ترضى، فالسـت وافقت وحلقت شعرها وكانت هتعمل الخمس مشاهد، بس آخر مشهد ده أهم مشهد لأنه ده اللي هيفهمك الشخصية، فأول سنه لما حلقت شعرها الفيلم وقف بسبب ثوره 30 يونيو، وقفنا لأن كان معانا إلهام شاهين فكانوا هيقتلونا كلنا وكنا بنسمع صوتهم برا فقولتلها يا الهام لو عرفوا انه انتي هنا هسيبك و أجري، تاني سنه سماح حلقت شعرها برضة بس كنا في الشتا و الفيلم كله هيتصور في الصيف، فإضطرينا نستنى الصيف، فلما جه الصيف الممثلين دخلوا مسلسلات رمضان فإضطرينا نأجل للسنه اللي بعدها، تالت سنه امي تعبت و توفت وقولت لإلهام هاتي مخرج تاني قالتلي لأ انتي هتكملي فيلمك، فلما رجعنا نصور بعد كده كان الشتا دخل وسماح رفضت تحلق شعرها تالت مرة، وعندها حق فلبسناها باروكه والباروكه كانت وحشة أوي والمشهد ده كان الأهم وبتفهي منه الشخصية كلها لأنه يبين إنك بتشوفي الست اللي علطول حزينة وماسكة قطط دي بتنزل البيسين، فكانت عايزة أوصل إنه حتى السـت اللي شعرها محلوق دي قالت هعيش و هنزل المياة، المياة اللي هي الحياة».
وتابعت كاملة أبو ذكري: «الباروكه كانت وحشة جداً وانا المفروض هننهي الفيلم عليها، فلقيت إنه لو طلعتها بالباروكه دي قفلة الفيلم هتبقا كوميديه يعني، بس هي عندها حق تزعل و عندها حق متستحملش لمدة ٣ سنين تحلق شعرها زيرو، وهي عندها حق تكرهني و عندها حق متبقاش طايقة حد يقول إسمي قدامها، بس أنا أسفة يا سماح متزعليش مني، ويارب أعرف أعوضك، وبقولك أنا أسفة من هنا لحد آخر لحظة في حياتي».
![](https://media.algomhor.com/ArticleUpload/2023\12\16\a0d40e40-9b6c-41ab-a_1716_113022.webp)
أخبار ذات صلة
توقعاتك لنتيجة مباراة مصر وبوتسوانا في تصفيات أمم أفريقيا ؟
-
فوز مصر
-
فوز بوتسوانا
-
تعادل المنتخبين