شقيق شيرين عبدالوهاب: «أختي ولحم كتافي من خيرها.. حبيت أفرح جمهورها بطلاقها»

علق محمد عبدالوهاب شقيق الفنانة شيرين عبدالوهاب على أنباء انفصالها من الفنان حسام حبيب، الذي انفرد موقع الجمهور بتفاصيل الجلسة الأخيرة بينهما مساء أمس.

وعلق عبدالوهاب عبر حسابه على موقع التواصل الاجتماعي فيسبوك: «والله ولا كنت عايز أعلق على الموضوع أساساً، ولا عايز أصلًا يبقى ليا علاقة بأي حاجة، أنا بس المعلومة عندي من يومين وحبيت بس أكد و أفرح جمهورها والناس اللي بتحبها فقط، ومن كتر التليفونات والرسايل من السادة الصحفيين اللي حقيقي بجد مزعجين جدًا، وأنا مليش أي علاقة ولا قريب ولا عايز الحقيقة».

وتابع محمد عبدالوهاب: «بحبها أوي روحي وعمري واختي الكبيرة وتاج راسي وخيرها عليا ولحم كتافي من خيرها وامي التانية بعد امي، وبإذن الله هترجع تاني تكسر الدنيا وتمتعنا بفنها و غناها وصوتها و احساسها اللي مفيش زيه في الكوكب كله، وبتمنالها كل خير من كل قلبي وتاخد بالها من ولادها سندها في الدنيا ونور عينيها، بس كل ده ممكن يحصل وأنا بعيد في حياتي وهي في حياتها، وحياة أمي بحبها أوي بس والله، الطاقة اللي عندي يدوب علي قد شوية الأمراض اللي جتلي والحمدلله على كده، وأرجو من السادة الصحفيين، فضلاً وليس امراً أنا والقرآن والإنجيل والتوراة، مليش علاقة بأي حاجة أتمني تسبوني أرجع شخص عادي، ملوش علاقة غير بنفسه وبس شكرًا».