طوني خليفة: ندمت على موقف تسبب فى بكاء هيفاء وهبي

حل الإعلامي اللبناني طوني خليفة ضيفا على برنامج «حبر سري»، الذي تقدمه الإعلامية أسماء إبراهيم، والمُذاع على قناة القاهرة والناس.

بدأت الإعلامية أسماء إبراهيم بفقرة صابت ولا خابت، وعند سؤاله عن ندم طوني خليفة على حلقة أجراها وتسبب في بكاء الضيف، قال طوني: «كتير، وخاصةً في بداياتي، هيفاء وهبي واحدة منهم، صحيح طلعت تريند، ويمكن عمل شهرتي من برنامج ساعة بقرب الحبيب من بكاء هيفاء، بس دلوقتي لما ببص على نفسي، بقول ليه ست زي هيفاء أبكيها كده، ما كانش فيه داعي أحرجها بالشكل ده، بالسؤال عن بنتها وشفتي بنتك ولا لا، أنا مالي بيها بس كنت بلاحقها عشان كنت في بداياتي، بس أنا زعلتها في الوقت ده، بس هيفاء ذكية لدرة أنها مش بتزعل من حد، حتى لو مش بتحبه، ممكن تكون مش بتحبني بس عمرها ما ظهرت لي ده، يمكن فيه ناس أنا كنت بحبهم ولي فضل عليهم، بالعكس وروني كل عداوة».

بدأت الإعلامية أسماء إبراهيم بفقرة صابت ولا خابت، لتسأل الإعلامي طوني خليفة عن رأيه في إعلان بعض المشاهير بخوض تجربة المساكنة، ليرد طوني خليفة قائلًا: «أنا ما اعملش كده، لأني أتمسك بمقاييس المجتمع، كلنا عندنا ثغراتنا وسقطاتنا لكن أعملها بالمستور، أنا ضد المجاهرة، بمعنى إذا بوليتم فاستتروا، لأن كلنا عندنا معاصي محدش يقول معنديش معاصي، كلنا معرضيين للخطر، لكن لما تريد أن تخطيء أغلط ما تكونش قدوة في الغلط، قياسًا لتقاليد المجتمع، بالنسبة لي المساكنة غلط، يعني لو عملتها أعملها بالسر مش بالعلن».

وتابع طوني خليفة: «أنا عليا أربي أولادي من دلوقتي على الصح والغلط، لعمر معين بعد العمر ده مش هتدخل في شئونه الخاصة، ولو اكتشفت أنه عمل المساكنة هنصحه لكن لن أفرض عليه رأيي».

وعن آخر مرة زار طبيبه النفسي، قال الإعلامي طوني خليفة: «زمان كتير، أنا لما أروح لطبيب نفسي عشان كان عندي فوبيا، أول فوبيا جاتني عشان الرياضة، كنت بلعب رياضة كرة طائرة وأغمى عليا، من وقتها بطلت ألعب أي نوع رياضة، من عام 1997، بعدها اكتشفت ان عندي فوبيا من الطائرة والحريق والسلم في حالة النزول، من الزحمة ومن الكباري، الموسيقى العالية الأماكن المظلمة، دلوقتي مقدرش أعمل رياضة والطائرة أتأقلمت معاها».

وتابع خليفة: «أنا عندي وسواس بس مش ملتزم بأي تعليمات، هحكي لك قصة بجد، أعتقد بسببي في واحد أتوفى، زرته بعدها أتوفى، وبعدها زرت شخص آخر وأيضًا عمل حادث سير وأتوفى، وفيه حد قالي أنا عايز أروح لطبيب نفسي بسببك».

وأضاف خليفة: «أكتر حاجة بخاف عليها دلوقتي نفسي عشان أولادي».