نبيلة عبيد تكشف عن أفضل من يستحق لقب نجم مصر وتقديم سيرتها كعمل فني

عبرت النجمة نبيلة عبيد عن سعادتها الكبير بالتكريم في مهرجان البحر الأحمر السينمائي الدولي، وتحدثت عن لقب نجمة مصر الأولى، وحقيقة تقديم سيرتها الذاتية كعمل فني من قبل أحد نجوم الجيل الجديد.

وخلال لقاء تليفزيوني على جانب فعاليات المهرجان، كشفت نبيلة عبيد عن شعورها لحظة إعلان التكريم، قائلة: كنت مرعوبة وأنا رايحة في الطريق علشان اتكرم، ولكن الكلام اللي اتقال خلاني سعيدة وفخورة، الفترة اللي أنا اشتغلت فيها كانت كلها عن المرأة، أنا عاملة أكثر من 90 فيلم وبدأت مع الأدباء الكبار زي محمود أبو زيد ووحيد حامد ومصطفى محرم، كل دول كانوا بيكتبوا للمرأة، فأنا كان عندي حصيلة كبيرة من أفلام المرأة، والحمد لله الناس فاكرة أفلامي وبتتكلم عليها.

واستكملت تصريحاتها عن إيرادات أعمالها الفنية: في بعض الأفلام عملتها في سوريا ولبنان ومعجبتش الناس، وأنا محبتش نفسي في المكان ده، وغيرت الطريق خالص وروحت لـ إحسان عبد القدوس وخدت روايات وخدت الطريق ده، أنا أفلامي كلها كانت بتجيب فلوس.

وعن لقب نجمة مصر الأولى، أكدت أن التقييم يكون من خلال الأموال، قائلة: أنا كنت مخضوضة وخايفة من لقب نجمة مصر الأولى وقولت هيقولوا عليا إني مغرورة، ولكن قالولي تستاهلي اللقب، لأن أنا كنت الأولى في البيع، وأنا مع أن محمد رمضان نمبر وان لأنه أول واحد في القائمة، هو بيبع كويس والناس بتحبه.

نبيلة عبيد: مش بقبل بأي مخرج

وأكدت أن دور المخرج هو أهم شخص بالعمل، ويجب عليه الدمج بين الأجيال القديمة والحديثة، موضحة: الأفلام اللي بتتعرض عليا دلوقتي بفكر أني لازم أكون في وسط شباب ولكن ببقى خايفة لأن آخر مخرج اشتغلت معاه كان سعيد مرزوق، مين هيبقى بعده؟ أنا مؤمنة بالمخرج والورق دول اللي يخلوني أقول حاضر واشتغل وأنا مرتاحة، طبعًا مش هعمل أدوار زي الأول ولكن في أم بتطلع، لازم الشخصيات تتوظف علشان يمزجوا الجيل القديم بالجديد، أنا مؤمنة بالجيل الجديد وبيعملوا حاجات حلوة.

وعن تقديم مشوارها الفني كعمل درامي، علقت نبيلة عبيد قائلة: دينا الشربيني كانت عرضت أنها تعمل قصة حياتي، ولكن أنا اللي هعمل قصة حياتي ولكن مش دراما وأنا اللي هحكيها تفاصيل المجهود الفني، أنا كنت بتحمل كتير أوي ولما وصلت لكل ده كان بالتعب.