علي الألفي عن صابرين: موهبة كبيرة لكنها متشتتة

أعرب الفنان علي الألفي، عن حبه الشديد بالفنانة صابرين، مشيدًا بموهبتها الفنية المتفردة، موضحًا أنها تشبه جميع فتيات مصر، بملامحها البسيطة وجسدها الطبيعي بعيدًا عن أي عمليات تجميل.

وكتب «الألفي» عبر حسابه الرسمي بموقع التواصل الاجتماعي «فيسبوك»: «عندي حب حقيقي مش مفهوم تجاه صابرين، صابرين هي نموذج للموهبة المصرية الكبيرة المتشتتة بين كل حاجة في مش باين منها حاجة أو الشخص اللي عنده طاقة كبيرة أوي أوي فلما بتشوف طاقته تتخض وتبعد».

رسالة علي الألفي لـ صابرين

ووصف صابرين بـ «الكيوت»، معلقًا: «صابرين هي البنت الكيوت أوي في أبو العلا البشري، ثم نجمة الاستعراض في فوازير يحيي الفخراني وهالة فؤاد وهنا عندنا مشكلة.. موهبتها العظيمة بحق تختفي بين كاريزما الدكتور وهالة هالة فؤاد الملائكية رغم أنها الأقوى غناءً واستعراضًا».

وأردف: «صابرين طفولتنا مين فيكم أشطر كتكوت؟؟ صابرين اللي شبه كل بنات مصر وطبيعة جسمها بتملى بسرعة فلم تسلم من نار أقلام صحفيين التسعينيات الشرسة وبقت طول الوقت تخس وتتخن».

وأضاف: «ودي حاجة أؤكد لكم أنها تخلي الواحد يفقد عقله، صابرين مسلسل أهالينا اللي كسر الدنيا في سنته وقدم لينا الموهبة الظريفة منى زكي بشكل مختلف، صابرين اللي بتعرف تغني حبت تعمل البوم تسعيناتي راحت لمحمد ضياء صانع الـ (هاني شاكريات) وعمل حاجة في منتهى الـ(هاني شاكر) وعشان طاقتها عالية، الموضوع كان أوفر وصعب».

واختتم: «البوست في حب صابرين.. الموهبة المصرية أوي.. أشطر كتكوت.. اللي لو كان حد فهم طاقتها.. كان الموضوع بقى في مكان تاني بلغوها سلامي ومحبتي».