رانيا يوسف تروي تفاصيل تعرضها للتحرش في المراهقة من شخص تعرفه

فتحت الفنانة رانيا يوسف، صندوق ذكرياتها وكشفت عن تفاصيل تعرضها للتحرش في فترة المراهقة، إلى جانب حديثها عن علاقتها بوالدتها، وتعليقها على أزمتها الشهيرة بفستان البطانة، خلال لقاء تليفزيوني منذ قليل.

وتحدثت رانيا يوسف في تصريحاتها: «تعرضت للتحرش وأنا عندي 18 سنة من شخص في دائرتنا، ولكن مش قريب مننا، والحق دايمًا على المتحرش، ونسبة الإغراء مالهاش دخل، اللي بيتحرش ده حد مريض، لأنه بيستغل الأطفال والستات وكمان الرجالة، يبقى أكيد حد مش سوي».

وعن علاقتها بوالدتها قالت: «ذكرياتي مع والدي أكتر لأن والدتي كانت مضيفة جوية ومكنتش موجودة في طفولتي، ولما بدأت أكبر بقى والدي هو اللي مش موجود وهي اللي موجودة، والدتي مكنتش قاسية ولكنها عملية طول الوقت».

واستكملت رانيا يوسف: لغاية النهاردة الاختلاف والفجوة بيني وبين أمي بتزيد، وفي مرحلة في حياتي كنت بشحت منها الاهتمام، وهي فيها عيب خطير إنها بتيجي على الغلطة اللي عملتها وتضغط، بتبقى عايزة تعلمني ولكن بطريقة قاسية شوية، وقبل جوازي من أبو ولادي اختلفت أنا وهي بسبب إني كنت عايزة أعمل بيت وهي بتقولي لأ مش مهم ومش مهم تخلفي.

رانيا يوسف: مش ندمانة على فستان البطانة
كما تحدثت رانيا يوسف، عن عدم ندمها بعد إطلالتها المثيرة للجدل والتي عُرفت بفستان البطانة، حيث قالت: «مش ندمانة على إطلالة فستان البطانة، ودي تجربة عرفت منها مين اللي بيضربني ورا ضهري ومين اللي عامل صاحبي وبيقوم عليا النقابة ويقوم عليا الناس».