آيتن عامر تدافع عن زملائها: «ندعم فلسطين لكن علينا التزامات»

ردت الفنانة آيتن عامر على الهجوم الذي تعرضت له، من قبل رواد مواقع التواصل الاجتماعي، عبر حسابها الرسمي على موقع تبادل الصور والفيديوهات «إنستجرام».

عبرت الفنانة آيتن عامر عن غضبها من الهجوم الذي يتعرض له الفنانين بسبب عمل دعايا لأعمالهم، عبر حساباتهم الرسمية على مواقع التواصل الإجتماعي، خاصةُ أنهم أعلنوا تضامنهم من قبل مع القضية الفلسطينية، والبعض أجل أعماله الفنية والتزاماتهم لأكثر من شهر.

وقالت آيتن عامر خلال الفيديو: «السلام عليكم ورحمة الله وبركاته، يارب تبقوا بخير، أنا طالعة النهاردة عشان أقولكم بس حاجة صغيرة، أتمنى أنكم تستوعبوها وتفهمونا كويس، هتكلم عن نفسي مش هتكلم عن حد، اللي عايزة أقوله بس، مش معنى أن إحنا بنعمل دعايا لشغلنا، إن إحنا كدة ناسين القضية الأساسية، اللي كلنا بنتكلم عنها، وأنا بقالي شهر ونص من أول ما الكارثة دي حصلت، وأنا مش بعلن غير عن اللي بيحصل في غزة، والأكونت بتاعي كان هيتقفل بس اللي بنشره عن غزة طول الوقت».

وتابعت آيتن عامر قائلة: «عايزة أقولكم على حاجة، زي ما إحنا مؤمنين بالقضية وبندعمها بكل ما أوتينا من قوة وبكل اللي في إيديناـ بيصعب عليا لما حد من زمايلي، يعلن عن شغله والناس تهاجمه وتقوله انت مش حاسس بالناس، أو يعملوا له إلغاء متابعة، طبعًا كلنا متأثرين، بس ردود أفعالكم مش عارفة ليه حساها فريبة شوية، ونسيتوا أن ده جزء من شغلنا ومن عقودنا، ليه بتهاجمونا اننا بنمارس شغلنا، أنا مش شايفة أن ده سبب منطقي أبدًا، احنا ممكن نهاجم حد لم يدعم القضية خالص، أو ما اتكلمش عنها، لكن بيكون بيساند القضية وبيتكلم عنها، وانتوا تهاجموه وتقولوا له كلام تقيل، ماينفعش أقول لحد ماتروحش شغلك، ماتعملش واجباتك وماتلتزمش بعقودك، بس أقدر أقوله انت ليه ما اتكلمتش، على الرغم من انها حرية شخصية، مش معني إني احنا بنعلن عن شغلنا،يبقى بنشغل الرأي العام عن القضية، لأ هو نفس الكونت اللي بيعمل إعلانات شغله هو نفس الأكونت اللي بينشر الكوراث اللي بتحصل في فلسطين، ليه واخدين موقف اوي كده من الفنانين،دي حاجة مش قادرة استوعبها صعبان عليا من عيلتي الكبيرة، اللي انتوا بتعملوه فيا وفي زملاء ليا، ارجوكم استوعبوا إن الإعلان عن شغلنا على الحسابات بتاعتنا، ده شغل احنا ملزمين بيه، وجزء من عقودنا وإحنا حابين ان شغلنا يكمل ةمش حابين أنه يتأثر، لأن في الآخر محدش هينفع حد، ولا حد هيحس بحد، من فضلكم كفاية هجوم، زي ما أنتوا بتعملوا شغلكم إحنا بنعمل شغلنا، ومحدش يزايد على حد، محدش عارف احنا كل يوم بنمر بإيه، احنا إحساسنا إيه تجاه اللي حاصل، بلاش مزايدات، كل واخد فيه اللي مكفيه، كل واحد يعيش بالطريقة اللي هو عايزها، ولو عايز تلغي المتابعة براحتك، مش ده اللي هيأثر عليا، اللي مضايقني أنكم مش مقدرين، اللي احنا فيه، كلنا شايفين اللي بيحصل، وقلبنا موجوع عليهم، وبندعي لهم وبندعمهم، ولكن مش صح نهاجم أي فنان عشان بيعلن عن شغله، العيب إني ما التزمش بعقودي، وما أعلنش عن شغلي، أفرح بنجاخي وأزعل على القضية وأدعي على اللي بيأذيهم، أنا بشتغل عشان عندي إلتزامات، الدنيا هتقف لو بطلت شغلي عشان الناس هترفع عليا قواضي وهتحبس ومش هوفي إلتزاماتي، أنا أسفة محدش يزايد على حد، أنا بدافع عن نفسي وعن زمايلي، ودلوقتي أنا هروح أصور وأحتفل بعيد ميلادي، وبرضه حزينة على فلسطين».