أحمد العوضي: «ياسمين خط أحمر.. والنجومية مش دايمة»

حل الفنان أحمد العوضي، ضيفًا في برنامج «حبر سري»، الذي تقدمه الإعلامية أسما إبراهيم، المذاع على قناة القاهرة والناس، يومي الخميس والجمعة العاشرة مساءً.

وأضافت أسما إبراهيم سائلة العوضي: «هل بتتضايق من أي نقد على السوشيال ميديا؟».

رد أحمد العوضي قائلًا: «لا خالص، حق أي حد يقول أي حاجة، لو غلط فيا كممثل أو كشخص، مش برد الجمهور ليه يقول أي حاجة، أنا بعرض منتج على التليفزيون، يمكن أكون أنا مقصر في حاجة مضايقاه، مش من الرجولة أشتم حد ما أعرفوش، لكن ياسمين دي أهل بيتي، محدش يقدر يتكلم عنها، اشتمني أنا براحتك، مش لازم كل الناس تحبني، لكن مش هرد على الناس، وأنا جمهوري بيحبوني أوي، لكن النجومية قيدتني شوية، مش بتضايق من الناس، لكن مش بعرف أعمل حاجة في مكان عام، ماينفعش حد يحبني أقلب وشي عليه، وتزعل لما محدش يعبرك، الجمهور دول نعمة في حياتنا».

وتابع العوضي: «النجومية مش دايمة، كلنا ماشيين برحمة ربنا، مش بالشطارة، ربنا بيسخر ناس ينفذوا إرادته، لو أدركت كده هتتغر له، مش هيعيش لك غير الكلام الحلو والمواقف اللي بتعملها مع الناس». 

وطرحت الإعلامية أسما إبراهيم سؤالا على أحمد العوضي: «إيه المبررات اللي تخلي الراجل يعرف على مراته واحدة ثانية؟».

رد العوضي قائلًا: «صيغة السؤال ده بالنسبة لي، غلط معنى كده إن فيه حالة قائمة، يبقى فيه مبرر، مفيش مبرر يخلي الراجل يعرف على مراته واحدة، لو مش مبسوط طلق، لكن ما تخونش، الراجل لا يملك إلا هيبته، والمرأة لا تملك إلا احترامها، هو ده اللي بيميز ست عن ست، والراجل عن راجل، مش مبسوط طلق، لو هتستحمل عشان أولادك استحمل عشانهم، مفيش حد بياخد كل حاجة، فيه رجالة بتخون وفيه ستات بتخون، ربنا حرم على الرجل والست الخيانة، مش على الست ولا الراجل بس، لكن الخيانة بالنسبة لي غلط، ولو عايز تتجوز على مراتك، لازم تقولها، وهي حرة توافق أو ترفض، لكن بلاش تتجوز من غير علمها، عشان كده هتفقد إحرامك من الاتنين، لو مش مبسوط سيب حياتك دي، وأعمل حياة جديدة، بمكن تتبسط فيها، لكن الخيانة بلاش، ده رأيي».