أحمد العوضي: «بعد مسلسل الميزان عرفت إنى هوصل للنجومية»

حل الفنان أحمد العوضي، ضيفًا في برنامج «حبر سري»، الذي تقدمه الإعلامية أسما إبراهيم، والمذاع على قناة القاهرة والناس، يومي الخميس والجمعة العاشرة مساءً.

طرحت الإعلامية أسما إبراهيم سؤالًا على أحمد العوضى، عن الوقت الذى شعر فيه بأنه يمتلك موهبة التمثيل.

رد العوضي قائلًا: «وأنا في خامسة ابتدائى، قدمت أول مشهد من مسلسل الفرسان، لأستاذ أحمد عبدالعزيز، وإخراج حسام الدين مصطفى، مشهد قتل بيبرس لقطز، كنت بحب المشهد ده أوي، وكنت بمثله في المدرسة وقدام عيلتي».

استبشر أحمد العوضي خيرًا بموهبته، عقب أدائه في مسلسل الميزان قائلًا: «ابتديت أقول أنا جاي، فيه نجم جاي، بعد نصيبي وقسمتك أتأكدت بقى».

وعن توقفه عن التمثيل لمدة 5 سنوات عقب مسلسل الدالي، طرحت الإعلامية أسما إبراهيم سؤالًا على العوضي، عن شعوره بالإحباط وأن يغير وجهته، ويتجه للعمل في مجال آخر.

قال أحمد العوضي: «دي مشكلة بيقع فيها ناس كتير، أنت عندك هدف، وعايز توصله، والحياة أو الظروف تعطلك، ويبدأ يستسهل ويقول الناس بتحاربني، وممكن يرمي ده على البيئة، ده بيدمر، أنت بتوجه عقلك فين، هو عقل واحد مش 4 عقول، ماينفعش أوجه عقلي إني بتحارب، لازم أوجهه إن أنا ناقصني حاجة، لازم أطور نفسي، لغاية ما أوصل للي أنا عايزه، أكيد أنا ماينفعش أكون نجم دلوقتي، الفنان الراحل نور الشريف قالي لسه وقتك ماجاش، بس أنا كنت مستور، كنت مأجر عربيتي، واشتغلت في نادي فيديو زمان، بس الحمدلله ماجوعتش، مش بحب أعيش دور الضحية، تعبت عشان أوصل للي أنا عايزه في شغلي، أنا كنت مولود في منطقة شعبية، ماكنتش بنام من غير أكل، مستور الحمدلله».