أحمد العوضي: «مش بروح مناسبات غير لأصدقائي في الوسط الفني»

حل الفنان أحمد العوضي، ضيفًا في برنامج «حبر سري»، الذي تقدمه الإعلامية أسما إبراهيم، المذاع على قناة القاهرة والناس، يومي الخميس والجمعة العاشرة مساءً.

سألت الإعلامية أسما إبراهيم، أحمد العوضي: «ليه عمرنا ما شفناك، في فرح أو عزا، في أي تجمعات تخص الوسط الفني، أنت مالكش أصحاب فيه؟».

وقال أحمد العوضي، أنه لا يحب الظهور كثيرًا، قائلًأ: «ليا أصحاب، رحت عزا الفنان محمود ياسين، لأن عمرو محمود ياسين صاحبي، رحت عزا والدة محمود مملوك، لازم يبقى صاحبي عشان أروح، لكن لو ماتربطنيش بيه علاقة، مادام ما أعرفوش أروح ليه، كده أنا رايح عشان أتصور، كلهم زمايلي، وعلى نفس القدر من الإحترام بالنسبة لي، لكن مش قريبين ليا، بس عندي أصحاب من الوسط، منهم تامر مرسي، طارق الجنايني وبيتر ميمي وأحمد خالد موسى، ومحمد أمين وحسام شوقي، فيه ناس كتير، لكن الممثلين كلهم زمايلي، ومش مقصودة إني مش عندي أصدقاء منهم، لكن أصحابي من خارج الوسط الفني، دول كبرنا مع بعض، ولغاية دلوقتي مع بعض، أًصحابي من زمان مش هيتغيروا مشينا مشوار مع بعض».

وطرحت الإعلامية أسما إبراهيم سؤالا على أحمد العوضي: «إيه المبررات اللي تخلي الراجل يعرف على مراته واحدة ثانية؟».

ورد العوضي قائلًا: «صيغة السؤال ده بالنسبة لي، غلط معنى كده أن فيه حالة قائمة، يبقى فيه مبرر، مفيش مبرر يخلي الراجل يعرف على مراته واحدة، لو مش مبسوط طلق، لكن ما تخونش، الراجل لا يملك إلا هيبته، والمرأة لا تملك إلا إحترامها، هو ده اللي بيميز ست عن ست، والراجل عن راجل، مش مبسوط طلق، لو هتستحمل عشان أولادك استحمل عشانهم، مفيش حد بياخد كل حاجة، فيه رجالة بتخون وفيه ستات بتخون، ربنا حرم على الرجل والست الخيانة، مش على الست ولا الراجل بس، لكن الخيانة بالنسبة لي غلط، ولو عايز تتجوز على مراتك، لازم تقولها، وهي حرة توافق أو ترفض، لكن بلاش تتجوز من غير علمها، عشان كده هتفقد إحترامك من الاتنين، لو مش مبسوط سيب حياتك دي، وأعمل حياة جديدة، بمكن تتبسط فيها، لكن الخيانة بلاش، ده رأيي».