أحمد العوضي: «مفيش مبرر للخيانة.. مش مبسوط طلق»

حل الفنان أحمد العوضي، ضيفًا في برنامج «حبر سري»، الذي تقدمه الإعلامية أسما إبراهيم، والمذاع على قناة القاهرة والناس، يومي الخميس والجمعة العاشرة مساءًا.

طرحت الإعلامية أسما إبراهيم سؤالا على أحمد العوضي: «إيه المبررات اللي تخلي الراجل يعرف على مراته واحدة ثانية؟».

ورد العوضي قائلًا: «صيغة السؤال ده بالنسبة لي، غلط معنى كده أن فيه حالة قائمة، يبقى فيه مبرر، مفيش مبرر يخلي الراجل يعرف على مراته واحدة، لو مش مبسوط طلق، لكن ما تخونش، الراجل لا يملك إلا هيبته، والمرأة لا تملك إلا إحترامها، هو ده اللي بيميز ست عن ست، والراجل عن راجل، مش مبسوط طلق، لو هتستحمل عشان أولادك استحمل عشانهم، مفيش حد بياخد كل حاجة، فيه رجالة بتخون وفيه ستات بتخون، ربنا حرم على الرجل والست الخيانة، مش على الست ولا الراجل بس، لكن الخيانة بالنسبة لي غلط، ولو عايز تتجوز على مراتك، لازم تقولها، وهي حرة توافق أو ترفض، لكن بلاش تتجوز من غير علمها، عشان كده هتفقد إحترامك من الاتنين، لو مش مبسوط سيب حياتك دي، وأعمل حياة جديدة، بمكن تتبسط فيها، لكن الخيانة بلاش، ده رأيي».

وبدأت الإعلامية أسما إبراهيم حلقة حبر سري، بفقرة صابت ولا خابت، لتسأل العوضى في حالة طرح الثنائي العوضى وياسمين عبد العزيز فيلما سينمائيا في نفس التوقيت، من سيكون صاحب الأعلى إيرادات.

ليرد أحمد العوضي قائلًا: «طبعًا ياسمين، أنا هكون عايز ياسمين تعمل إيرادات أعلى من أي حد، دي ياسمين عبدالعزيز، وتعمل كده طبعًا، وبحكم السوق ياسمين تعمل إيرادات قدى 40 مرة، وأنا هكون مبسوط لها».

وعن أقرب لقب لقلبه من أعماله، قال أحمد العوضي: «بحب لقب الخديوى، لأن طريقته أقرب لطريقة كلامي، بس كلهم قريبين لقلبي، بحب الكوماندا وبروسلي».

وأضاف أحمد العوضي، أن سبب تأخر عرض فيلم «البلدوزر»، قائلا: «مضيت الفيلم عام 2022، وأنا أعلنت عنه، بعد كده طارق العريان انشغل في تصوير معاوية، وأنا انشغلت في تصوير ضرب نار، اتفقنا نأجل الفيلم، الفرق اللي حصل في العملة، لأن الفيلم هيتصور في لاس فيجاس، اضطريت أأجله تاني، هو حضر فيلم لعب عيال، وأنا بصور الإسكندراني، ومفيش منافسين للفيلم، لأنه حالة فريدة من الأفلام، هو قصة بطل MMA، ومعنديش مشكلة إن حد ينافسني، أنا مش بقلق من حد، بعمل شغلي وبجتهد فيه، مش ببص لحد، أو أفكر مين وصل قبلي، كلنا نعمل أعمال وننجح، المهم إني أنجح».