جمال العدل يكشف حقيقة اعتزال عبلة كامل

كشف المنتج جمال العدل، عن حقيقة اعتزال الفنانة عبلة كامل، خلال برنامج «حبر سرى»، وتقدمه الإعلامية أسماء إبراهيم، ويُذاع على قناة القاهرة والناس.

ونشرت الإعلامية أسماء إبراهيم مقطع فيديو للمنتج جمال العدل، يرد على تصريحه السابق في أحد اللقاءات التليفزيونية، باعتزال الفنانة عبلة كامل مهنة التمثيل بشكل نهائي، وهل هذا التصريح بناءً على معلومة من الفنانة عبلة كامل، أم توقع من المنتج جمال العدل؟.

وقال جمال العدل خلال الفيديو: «أنا معنديش معلومة، بس كلامي كان بناءً على توقع، لأن دلوقتي مفيش تواصل بينا، على الرغم من إننا أخوات وأصدقاء جدًا فوق الوصف، بس بقالها فترة كبيرة جدًا مش بشوفها، من كام سنة جات الشركة سلمت عليا، وقتها استشعرت إنها مش هتمثل تاني، رغم أنها ماقالتش حاجة، بس بعد ما جات لي ما مثلتش تاني، هي زي منال أختي، بس اختفاءها مش جديد عليها، أيام ما كنا بنمثل ريا وسكينة والعندليب، صعب ترني عليها وترد عليكي، دي طبيعتها، مشغلة عندها ناس في بيتها على الله كده، ماتعرفيش تاخدي منهم معلومة، ده لو حد رد عليا، وهي دلوقتي مش بتمثل صعب أوي إننا نكلمها ونوصلها، ومش بترد على تليفونها، ودايما قفلاه تفتحه للضرورة، تعمل مكالمة وتقفل، لكن هي ماقالتش إنها اعتزلت، وماقالتش أنها تعبانة، هي بس اختفت في هدوء».

يُذكر أن، جمال العدل كشف أنه أساء للفنانة يسرا دون قصد، قائلًا: «أنا بطبيعتي لو زعلت حد، أحب جدًا أعتذر له من غير البرنامج، الوحيدة اللي زعلتها الفترة اللي زعل غير مقصود، كانت يسرا، لأن يسرا دي ليها جانب، ومصر كلها في جانب، لأني في أحد الحوارات قلت أن مسلسل يسرا ماعجبنيش، وأدبًا مني أنا بقول مسلسل يسرا، ونسيت أنه مسلسل العدل جروب، يعني أنا مسئول عنه أكثر من يسرا، ويسرا ماكنتش مسئولة عن الكوميديا اللي اتعملت في المسلسل، أما يسرا دي أهم شخص في تاريخ العدل جروب، وبينا علاقة إنسانية أهم بكتير من الشغل، أنا لو كنت زعلتها أنا أسف جدًا، أنا ما اقصدش أزعلها، إلا يسرا، كل الناس تزعل إلا يسرا، أنا مش بزعل حد أصلًا، أزعل يسرا مستحيل بجد، شغل أو من غير شغل، العلاقة الإنسانية اللي بيني وبين يسرا تتعدى أي حاجة تخص الشغل، أد الشغل 20 مرة يعني، مش عايزة أقول رقم السنين، عشان الناس ماتحسدناش».