مروان يونس يدعم المنتجات المصرية: «عايز أفتح مصنع معجون أسنان»

انضم الإعلامي والفنان مروان يونس لحملة دعم المنتجات المصرية، عبر حسابه الرسمي على موقع تبادل الصور والفيديوهات «إنستجرام».

ونشر الفنان مروان يونس عبر إنستجرام من خلال خاصية أستوري، فيديو من برنامجه «بجد ع الراديو»، الذي يُذاع على راديو اينرجي، أثناء مناقشته لقضية دعم المنتجات المصرية.

وعلق مروان يونس خلال الفيديو قائلًا: «يا مساء الخير يا جماعة، النهاردة فتحت موضوع، مش عارف إزاي مافتحتوش على السوشيال ميديا، بما إني مؤثر يعني، دلوقتي المنتجات المصرية بقى عليها   التركيز والضوء حلو جدًا، وأنا فخور جدًا، وحابب إني أدعم المنتجات المصرية».

وتابع مروان يونس متسائلًا: «أنا عندي سؤالين، السؤال الأول، إيه المنتج المصري اللي أنت مستني تشوفه؟، زي مثلًا اكتشفت إن مفيش معجون أسنان مصري، لو حد حابب يفتح مصنع، ياريت ويدخلني معاه شريك، وأنا هسوق لك والله، والسؤال الثاني إيه كان عيب المنتج المصري؟، يعني ليه إحنا ماكناش بنشتريه؟، هل هي مشكلة علامة تجارية؟، هل مشكلة إن هما مش معاهم فلوس؟، ودلوقتي لما بقينا إحنا بنشتريه، المنتج ده هيتحسن في الجودة والتغليف، ثالث حاجة حابب أقولها، اللي عنده منتج مصري بيبعه، أو يعرف حد عنده منتج مصري بيبعه، يعمله منشن، أو يقولنا هو فين عشان نقدر نشتريه، وخلوا البوست ده يبقى عبارة عن منتجات مصرية، الناس تقدر تشتريها، أخر حاجة ربنا ياخد الكيان الصهيوني، شكرًا وإلى اللقاء».