محمود سعد: «بيومي فؤاد مش فاهم يعنى ايه فنان»

علق الإعلامي محمود سعد، على تصريحات الفنان بيومي فؤاد ضد الفنان محمد سلام وذلك عقب اعتذاره عن المشاركة بموسم الرياض في مسرحية «زواج اصطناعي».
 

ونشر محمود سعد، مقطع فيديو، عبر حسابه الشخصي بموقع التواصل الاجتماعي «فيسبوك»: «محمد سلام خد موقف شجاع وهو عزيز على قلبي ومقدرش لأنه مش بيحتقر الفن، ولكنه فعلًا مقدرش يُقف على المسرح وهو في الحالة دي، وكان من المفترض يأخد الموقف وهو ساكت وملهاش لازمة أنه يعلن لكن موقفه محترم».

وأضاف: «بيومي فؤاد لا هو بيتكلم باسم دولة ولا نقيب ممثلين وده تصرف شخصي منه، وطلع قال كلمتين وحشين ومش فاهم الممثل المفروض يتكلم يقول إيه، ولا فاهم يعنى إيه فنان لما يمثل بلد يقول إيه».

وتابع: «راجع نفسك يا بيومي وأطلع قول أنا آسف، أنت فنان وليك جمهور، ولازم تحترمه، ولابد أن تقول للناس أنا كنت منفعل زيادة عن اللزوم والموضوع هينتهي».
 

أزمة

أثار الفنان بيومي فؤاد، جدلًا كبيرًا عبر مواقع التواصل الاجتماعي خلال الساعات الأخيرة، بسبب انتقاده لموقف محمد سلام تجاه القضية الفلسطينية، واعتذاره عن المشاركة في موسم الرياض.

وقال بيومي فؤاد بعد نهاية المسرحية على خشبة المسرح: «من حقك إنك تعتذر عن المسرحية لكن مش من حقك إنك تغلط في فنك، إحنا مبنجيش عشان نضحك حضراتكم، ولو الموضوع كدا يبقى في فنانين من أيام نجيب الريحاني لحد محمد أنور، مفروض ينتحروا إحنا بنقدم فننا المصري وانتم بتحترمونا واحنا بنحترمكم جدًا».

وتابع: «شيء عظيم إن الفنان يبقى ليه جمهور في كل الدول، شيء عظيم إني أخرج أتصور مع شاب سعودي أو سيدة سعودية وهي تعلم إن أنا مصري أنا بشرف بلدي، أنا فنان مصري وليا الشرف».

واستطرد: «أنا وكل زملائي دول بنحبكم وبنحترمكم وهنفضل طول عمرنا معاكم، إحنا اتظلمنا والله واتهنا، وإحنا جايين نقدم فن، أقسم بالله إحنا مش بتوع فلوس أقسم بالله والله العظيم ما بتوع فلوس».