وفاء عامر تدافع عن بيومي فؤاد وتوجه نصيحة لـ"محمد سلام"

أكدت الفنانة وفاء عامر، أن الفنان بيومي فؤاد، لم يخطئ في موقفه من الفنان محمد سلام، كذلك تصرف الأخير واعتذاره عن المشاركة في موسم الرياض ليس خطأ، موضحة أن كل واحد منهما قال نفس الرأي ولكن بطريقة مختلفة.

ودافعت عن كلا من سلام وبيومي، مشيرة إلى أن «سلام» لم يتحمل الوقوف على خشبة المسرح في ظل الأحداث التي تتعرض لها فلسطين.

وقالت «عامر» في تصريحات تلفزيونية: «محمد سلام مش قادر يوقف على المسرح.. إحنا مكبرين المسألة زيادة عن اللزوم، زي ما في واحد يدوس على قطة في الشارع ممكن يعيط زي حالاتي، يعني مرة جالي ضيق شديد لما خطبت حيوان وكنت هموت.. في ناس ممكن تقدر وممكن متقدرش».

تعليق وفاء عامر على تصريحات بيومي فؤاد

وأشارت إلى أنها كانت ستقبل المشاركة في المسرحية إذا عرض عليها الدور، لأنها ممكن أن تستغل ذلك لدعم القضية الفلسطينية.

وأردفت: «أنا ممكن استفيد من الموقف في وقت أخواتنا في فلسطين وعاوزين الناس تقف جنبهم، يعني محمد سلام تصرفه مختلف وأنا تصرفي مختلف.. وأيتن بتعيط ليل ونهار بسبب اللي بيحصل».

وأضافت: «بيومي فؤاد كان بيتكلم من منطلق تاني.. أنا مش هدافع عن الإتنين أنا هتكلم بشكل حيادي كل شخص وليه وجهة نظر، هل مصانع الأسحلة اللي بيقتلوا بيها فلسطين بمنتهي القسوة وقفت!؟.. هل الأرض بطلت تطرح!؟، ده اللي كان عاوزه يقوله بيومي فؤاد ومحمد سلام».

واستطردت: «في ناس كانت وجهة نظرها أن الفلوس اللي كان هياخدها محمد سلام من المسرحية يتبرع بيها للهلال الأحمر وكان راح السعودية يعرف الناس القضية عشان تدعم أكتر.. أنا واحده كان ممكن أطلع على المسرح اعمل إسقاط على ما يدور وكنت أخد تعاطف الناس في أيدي عشان أقولهم الناس اللي هناك في فلسطين لا تستحق ذلك العنف».

واختتمت: «بلاش نلوم على حد أعتذر أو مش قادر إحنا الفنانين بنحب أوي وطنا وبيصعب علينا ما يدور سواء في فلسطين أو قبله في العراق أو ليبيا.. أنا بقالي 5 أيام جالي اكتئاب بسبب اللي بيحصل ومحمد سلام مقدرش يكمل ومش متطاول على حد.. وفي فنانين قالوا إنه حط علينا وطلع أحسن مننا هي مقدورات أنا أقدر بس ممكن غيري ميقدرش».