دعاء فاروق: «ما تشتروا الماركات وتغيروا العلامة التجارية»

طالبت الإعلامية دعاء فاروق، رجال الأعمال المصريين بدعم الحملات التي تدعو لمقاطعة المنتجات الأجنبية ولكن بطريقة أخرى غير المقاطعة وهي شراء أسم الماركات العالمية وتغيير العلامة التجارية.   

وقالت «فاروق» عبر مقطع فيديو على حسابها الشخصي بموقع تبادل الصور والفيديوهات «إنستجرام»: «من امبارح في حملة نازلة ضد المقاطعة نازلة في كل مكان، وأن المقاطعة دي بتؤذي المصريين وتلغي الاستثمار في مصر، وأنا اتخضيت من قلة الوعي شوية اللي عند بعض الناس، وأتمنى الناس تقبل الرأي الآخر اللي يدعم وبيقوي فكرة المقاطعة، والفرنشايز ده قوانينه معروفة في العالم كله، وهما مش بيدوك الأسم وخلاص جه بيديك خامات وعمالة وفي المقابل لازم يأخدوا فلوس».

وأضاف: «طول ما أنت واخد العلامة التجارية يبقى هتطلع نسبة من أرباحك للشركة الأم، يعني حتى لو أي ماركة فاتحة في مصر بناس مصريين بيروح نسبة من الأرباح للشركة الأم اللي بيملكها ناس يهود وبيكونوا بنسبة كبيرة صهاينة وبيدعموا الجيش اللي ما يتسموا، دي حاجة لا تخفى عن الجميع، والمقاطعة أثرت فيهم وإحنا بنخاطب كل العرب مش المصريين بس، لأنهم بيدفعوا ضرائب وبيدعموا الجيش الصهيوني». 

وتابعت: «طيب في ناس طيبين وبما فيهم أنا بيصعب عليهم الناس اللي شغالة والعمالة تتشرد، بالراحة دي مش كل العمالة اللي في مصر، أنا مثلا كنت في سوبر ماركت إسمه ولقيت كل البدائل للمنتجات الأجنبية، والشغل الأجنبي اللي هما في الآخر رؤوس الأموال بتاعة جيش الاحتلال وبيدعموهم، اللي حاولوا ينظفوا إيديهم ويقولوا إحنا مالناش دعوة بيهم بعد ما أتأثروا».

واستكمل: «هو إحنا عندنا رجال الأعمال قليلين؟ ما تشتروا الأسم وتغيروا العلامة التجارية، ما أنتوا تقدروا تعملوا كده ولا لازم نضحي بالعامل الصغير، ما تدعموا القضية بجد».