محمد أمين راضي يتهم «سلام» بعدم المهنية

هاجم المؤلف والسيناريست محمد أمين راضي الفنان محمد سلام بسبب اعتذاره عن موسم الرياض، قبل موعد السفر بساعات قليلة.

وكتب المؤلف محمد أمين راضي، عبر حسابه الرسمي على موقع التواصل الاجتماعي «فيسبوك» منشورًا، يعبر فيه عن حبه للفنان محمد سلام، بالإضافة إلى عدم استطاعته السكوت عن موقفه دون أن يعبر عن رأيه.

وعلق راضي قائلًا: «مش قادر، مش قادر، كونسبت (مفهوم) اني علشان بحب محمد سلام جدا، فأقرر  ما أقولش رأيي بصراحة، مضايقني  من اول ما قولت لنفسي  كده امبارح، لأن على الجانب الآخر ما صلاح الجهيني صاحبي، بس حقيقي بعيد بقى  عن المحبة و الصداقة، اللي عمله سلام  فعل غير مهني بالمرة، حتى ولو مشاعره صادقة، كان عادي يعتذر من أسبوع، مش قبلها بيوم، و كان عادي خلاص برضه ده يحصل بصمت، بدون اي فيديوهات تحرج زمايله  اللي موجودين  حاليا، وبتحرج اكتر اللي هيجي بعده،  خصوصا  انه سار العرف ان الواحد بيعمل الفيديوهات اللي بيوضح فيها موقفه  للناس، اللي هو عامل حاجة غلط في حقهم او اللي زعلانين منه، اللي همه في الحالة دي، الجمهور اللي قطع التذاكر بناء  على الإعلانات اللي هو موجود فيها لحد امبارح».

وأضاف محمد أمين راضي: «و طبعا الفيديو المعمول مش موجه خالص للجمهور اللي بتكلم  عليه، و الأهم بقى من كل ده، وفوق كل ده الفن مش رفاهية، الفن مش رفاهية او شيء  ممارسته تسيء و تقلل من هيبة الحزن، ومش  هتكلم  خالص عن خصوصية الفن  و دوره خالص، انا مش هتكلم  الا على كونه مهنة، مفيش اي مهنة  بيتطلب منها او بيتطوع صحابها من  نفسهم بالتوقف  عشان الظروف اللي إحنا فيها، ما قبلتش ان حد في بنك قرر يستقيل عشان خاله مات مثلا، وحقيقي انا مش فاهم ايه اللي حصل انا واحد اتربى على جيل من الفنانين كانوا بيتفاخروا، بأن أقرب الأقربين ليهم، أبوهم  مات وهما دفنوه وطلعوا على المسرح علشان عندهم   ميعاد خشبة مسرح، و عندهم جمهور قاطع تذاكر، واحترامه شيء مقدس، سيد مكاوي واخرين كان بيسافر الجبهة  بتاعت الحرب عندنا  احنا علشان يعملولهم حفلات مخصوص لرفع من روحهم المعنوية، فاللي احنا بنتكلم فيه لا هو بدعة و لا افورة مننا، في حقيقة الامر انتوا  مبتذلين».