فيدرا تشيد بموقف محمد سلام تجاه القضية الفلسطينية

أشادت الفنانة فيدرا، بموقف الفنان محمد سلام تجاه القضية الفلسطينية، بعد اعتذاره عن المشاركة في مسرحية «زواج اصطناعي»، التي من المقرر عرضها ضمن فعاليات موسم الرياض المقبل بسبب ما يحدث في غزة حاليًا.

وكتبت عبر حسابها الرسمي بموقع التواصل الاجتماعي «فيسبوك»: «هو كسب كل حاجة عشان عمل بعقيدته.. ما خافش من حد، خاف من نفسه اللي هتلومه لو ما عملش كده.. وطبعًا خاف من ربه.. سلام ما فيش منه كتير ده واقع».

وأضافت: «وطبعًا كل إنسان حر وكل إنسان عارف نفسه وعارف مقدرته ولا يكلف إلا وسعها، وسعها على الصعيد المادي والنفسي.. ده وسع سلام وده وسع باسم وده وسع صلاح».

محمد سلام يعلن اعتذاره عن موسم الرياض

من جلنبه، شارك محمد سلام فيديو مع جمهوره يعلن فيه اعتذاره عن موسم الرياض، وقال خلاله: «السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض إنشالله يوم 30 أكتوبر».

وأردف:«هنعرض في وسط الأحداث اللي بتحصل في غزة فأنا مش متخيل إني هروح أعمل مسرحية واهزر وارقص واخواتنا في فلسطين عمالين يتقتلوا ويدبحوا ومفيش حاجة بتحصلهم».

واستكمل: «أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكره إنشالله لأني كنت على أمل أن الموسم يتلغي أو يتأجل مثل مهرجانات الجونة والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا ازاي أروح اعرض وناس بتموت في فلسطين، حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وارقص».

وأضاف «سلام» خلال الفيديو قائلا: «أنا بعتذر عن المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني فأنا مش هقدر أعمل كده».

واختتم: «كان عندي الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا».