نفسي اتجحب.. أسما شريف منير: التزمت في الصلاة بسبب أحداث غزة (فيديو)

كشفت الإعلامية أسما شريف منير، عن تأثير أحداث غزة على حياتها وسلوكياتها خلال الفترة الأخيرة، موضحة أن ما يتعرض له الفلسطينيين من اعتداءات يومية، منحتها دافع قوي للالتزام في الصلاة، وارتداء الحجاب.

وأعلنت «شريف منير» عن رغبتها في ارتداء الحجاب، من خلال مقطع فيديو نشرته عبر حسابها الرسمي بموقع التواصل الاجتماعي «إنستجرام».

وقالت في الفيديو: «من ساعة اللي حصل في غزة وأنا خدتها عِند مع نفسي والتزمت في الصلاة وبقالي 15 يوم ملتزمة على الصلاة وقللت خروجي جدًا ودي حاجة مريحاني جدًا، وكل مرة الصلاة بتريحني وللأسف برجع تاني أتلهي في الدنيا ولكن دلوقتي بحاول، ونفسي انتظم على الصلاة لغاية ما أموت.. الصلة دي صلة بيني وبين ربنا».

أسما شريف منير تعلن رغبتها في الحجاب

وتابعت إبنة الفنان شريف منير: «الواحد يلتزم في الصلاة الأول وبعدين يغطي شعره، نفسي أعمل كده وربنا يهديني للحجاب وأنا خايفة أعمل حاجة تكون مثال مش كويس للحجاب، ودايمًا الواحد لما بيبدأ في الخيط الأولاني ومينفعش تنفره في الحاجة دي، ولازم دايمًا لما تشوف حد بيعمل حاجة ساعده وأعيله بالهداية، ولو أنت شايف حد أبو لهب افتح نفسه على الدين، واقتضى بالرسول عليه الصلاة والسلام».

وأردفت: «بعد ما التزمت بالصلاة حسيت إني ممكن أموت عادي، أنا دايمًا خايفة من الموت، لأني دايمًا حاسة إن ناقصني حاجات كتير قوي ومش عارفة هقف إزاي قدام ربنا، خايفة أموت وأنا مش جاهزة».

واختتمت: «ربنا يثبتني على الصلاة دايمًا والواحد نفسه السيئة والشيطان ساعات كتير بيدمر العلاقة اللي بيني وبين ربنا، وبحس إني لما بصلي بكون هادية وربنا هاديني وفي حد في ضهري ومفيش حد هيأذيني وعندي ثقة إن ربنا معايا».