أسما شريف منير لمنتقديها: أنا مش شيخة لازم نتعلم منبقاش «همج»

ردت الإعلامية أسما شريف منير، على الانتقادات التي تعرضت لها خلال الفترة الأخيرة بسبب حلاقة شعرها بالكامل، ووصل الأمر إلى التعدي عليها بالسب والقذف.

ونشرت «شريف منير» مقطع فيديو، عبر حسابها الرسمي بموقع التواصل الاجتماعي «إنستجرام»، وقالت فيه إنها ما زالت تتعرض للقذف والسب من قبل عدد من المتابعين.

وأضافت: «لسه فيه ناس بتشتمني للأسف.. مفيش منهم فايدة.. اللي بيزعلني أن الناس اللي بتشتم دي أكبر ناس مُدعيين ولو دخلنا عندهم بنلاقي كاتبين لا إله إلا الله وفلسطين الحرة، وبستغرب بجد أنهم لسه قادرين يدعوا في ظل الدرس اللي المفروض كلنا نستفاد منه، وبقيت أخاف أكتر من الناس لأنهم مش حقيقين وكدابين، الناس اللي بتشتم دي متعلمتش حاجة هو أنت شايف لما بتشتم حد بتاخد حسنات؟ أنت كده دكر أنت كده محصلتش؟ بتتعلم إيه وبتعلم اللي حواليك إيه؟، ربنا يهديهم ويهدينا كلنا وأنا ولا بفكر في الناس دي ولا حتى هعملهم بلوك».

وأردفت: «اللي بيحصل ده لازم يعلمنا حاجات كتير، ولازم نقعد نفكر مع نفسنا ونشوف إيه الحاجات اللي بندعي فيها، لأن العمر لحظة، اللي مزعل حد أو عامل حاجة غلط يقف مع نفسه».

رد أسما شريف منير على منتقديها

وتابعت: «الناس مبقاش عندها دم وفي كمية نفاق وكدب وانفصام في الشخصية رهيبة، لو أنت مسلم أو مسيحي الديانتين بينادوا بالاحترام، لما أنت تصدر ده للناس متزعلش لما يقولوا علينا همج».

واستطردت: «أنا مش شيخة ولا حاجة أنا إنسانة نفسي أتعامل مع بني آدمين طيبين، والدين أخلاق سواء إسلامي أو مسيحي، واللي الناس بتعمله ده مش منطقي، لازم نتعلم منبقاش همج ونعمل اللي دينا قال عليه باللي نقدر عليه، أنا مش محجبة وبأثر وبغلط في حاجات، واللي بيحصل ده لازم يعلمنا حاجة، بلاش ادّعاء وتوكلوا نفسكم إنكم تربوا الناس، ظبط نفسك الأول وشوف الطريقة اللي المفروض تكلم بيها الناس ولو عايز تساعد في هداية حد تتكلم إزاي الإسلام».

وواصلت: «المفروض تقوله ده الدين حلو أوي وافتح نفسه على الدين، لو أنت شايف إني مش مسلمة وطلعتني من الديانة، هل عشان أدخل تاني شايف أن دي الطريقة اللي تدخلني بيها تاني؟ يا جماعة والله العظيم ما ينفع اللي بيحصل ده، والله في ناس مافيش فيها فايدة وموجودين عشان نتعلم أن منبقاش زيهم، أنا مش زعلانة إنهم بيشتموني أبدًا ومحصنة نفسي منهم، اللي مزعلني أن في ناس فعلًا بيصدقوا نفسهم لدرجة الجنان وشايفين أنهم صح وبينتقدوا اللي قدامهم ويشاورا على الغلط وهما مش شايفين نفسهم».