أحمد العوضي يدعو متابعيه للتبرع لمؤسسة الهلال الأحمر

حرص الفنان أحمد العوضي على دعم القضية الفلسطينية من خلال التطوع لمؤسسة الهلال الأحمر المصري.

ونشر «العوضي» فيديو له عبر حسابه الرسمي على موقع تبادل الصور والفيديوهات «انستجرام» أثناء تواجده في مؤسسة الهلال الأحمر المصري، وهو يعمل بيده في تعبئة وتغليف المساعدات الطبية والغذائية للشعب الفلسطيني، موجهًا رسالة إلى متابعيه يدعوهم للتطوع والتبرع لمؤسسة الهلال الأحمر المصري تضامنًا مع الشعب الفلسطيني.

التبرع للهلال الأحمر لصالح غزة

وظهر في الفيديو وعلق قائلًا: «مساء الفل على كل أخواتي، طبعاً كلنا عايشين اللي بيحصل في غزة وأخواتنا في غزة، أنا هنا في مؤسسة الهلال الأحمر المصري، مع اخواتنا الأبطال المتطوعين في الهلال الأحمر، أنا بس عايز اطلب منكم حاجة، احنا خلاص نزلنا بوستات ونزلنا صور والحاجات دي مش كفاية، عايزك تتصرف تصرف فعلي، عشان ما يبقاش أن إحنا بنتفاعل بمجرد الكلام، واحنا من جوانا موجوعين عشان اخواتنا في غزة، أنا بطلب منك النهاردة، من كل أخ جدع وكل أخت جدعة شاغلها القضية ومتضايقة عشان أخواتها في غزة، انزل اتبرع ولو بجنية على 15322، احنا 105 مليون مش لازم تنزل تتبرع، هما في الهلال الأحمر مستعدين يجوا لك لغاية عندك، لو حطيت جنيه واحد، وأنا إخواتي كرماء، ومش هيتأخروا في شيء».

وتابع العوضي قائلًا: «في الهلال الأحمر هيسهلوا لك كل حاجة، لو أنت مش قادر تنزل، هما يجوا لك، لو أنت ماشي في الشارع وكلمتهم، هيجوا لغايه عندك ياخدوا منك التبرع ويعطوك وصل اللي يخليك متأكد انك فعلاً بتتبرع لمؤسسة الهلال الأحمر، كل الشباب المتطوعين أبطال بجد، ده غير اللي موجودين في سيناء، الناس دي مش عايزة حاجة، هما بس جايين يساعدوا في تعبئة الكراتين لأخواتهم في غزة».

وأردف: «لو عايز تتبرع بالدم انزل واتبرع، اعمل حاجة فعلية، وعبر عن صوتك، اتبرع ولو بجنيه، وصدقني هيفرق، احنا المصريين الجدعان وفي ضهر اخواتنا دايمًا، يلا نعمل كده، والهلال الأحمر المصري حاجة كبيرة جداً جداً، لو تعرفوا الناس دي بتعمل ايه مش مجرد أكل وشرب ومساعدات، أنا بشكر كل المتطوعين لأنهم جدعان، وأنا بقولكم الطريق اللي يخليك تساعد بشكل فعلي، انزل اتبرع ولو بجنية واحد بس».