حنان مطاوع: إسرائيل تحاول إبادة شعب لن يموت أبدًا.. وسيناء مش حل مطروح

أعربت الفنانة حنان مطاوع، عن استيائها الشديد مما تشهده فلسطين حاليًا من جرائم شنيعة خارج حدود الإنسانية من قبل قوات الاحتلال الإسرائيلي، واستشهاد الآلاف من أهالي غزة جراء القصف المستمر.

ودعت «مطاوع» جمهورها ومتابعيها، للمشاركة في الوقفات التضامنية مع الشعب الفلسطيني، التي انطلقت اليوم بعد صلاة الجمعة مباشرة في أمام المساجد في مختلف ميادين مصر. 

ونشرت مقطع فيديو عبر حسابها الرسمي بموقع التواصل الاجتماعي «إنستجرام»، وقالت من خلاله: «من ساعة ما صحينا على اللي بيحصل مع أطفالنا وأهالينا في غزة، وأنا مش عارفة أقول إيه المصاب جلل وبيصغر قدامه أي منطق، وبيعجز العقل أنه يحلل اللي بيحصل ده لأنه برا حدود الإنسانية والرحمة».

حنان مطاوع تدعم فلسطين

وأردفت: «هتسألني كلام زي ده أو وقفة نقفها ممكن تغير أي حاجة، هرجع أقولك أه لأن العدو مش بس بيحاول يبيد شعب لن يباد أبدًا بأمر الله وبإرادته الحرة الباسلة القوية، لأ ده كمان ابتدى يقرب على حدودنا ابتدى يتكلم عن سيناء تاني رجع يتكلم عن سينا».

وأضاف: «سيناء مش حل مطروح، سيناء مش مجرد أرض مصرية سيناء دفعنا فيها آلاف الشهداء عشان تنال حريتها ومستعدين ندفع أكتر كمان، سيناء الحلم التاريخي السخيف المجنون للعدو، عشان كده محتاجين كلنا نتضامن ونظهر للعالم كله إننا رافضين الأفعال الوحشية، اللي بتقوم بيها إسرائيل ضد فلسطين الحبيبة الباسلة وكمان إننا نقول لهم أننا اخترنا الكرامة والسيادة الكاملة على أراضينا».