باسم يوسف: «صلاح لا هيعرف يتكلم زيي .. ولا هلعب كورة زيه»

نشر الإعلامي باسم يوسف صورة له برفقة نجم منتخب مصر وليفربول محمد صلاح عبر حسابه الرسمي على موقع التواصل الاجتماعي «فيسبوك».

حيث نشر باسم يوسف هذه الصورة بعد تعرض محمد صلاح للهجوم الشديد عقب إعلانه دعم القضية الفلسطينية، مما أثار غضب متابعيه.

علق باسم يوسف على الصورة قائلًا: «انا شفت الصورة دي في كذا صفحة مع تعليق، "محمد صلاح.. متصور مع فخر العرب"، ده غير بوستات تانية كتيرة جدًا يا إما بتقارن لقائي مع الفيديو بتاعه أو بتقلل و تهمش و تتريق على فيديو صلاح».

وأضاف يوسف بعض النقاط لتوضيح وجهة نظره ويؤكد من خلالها دعمه لفخر العرب محمد صلاح وهذه النقاط هي: «المفروض في عالم طبيعي إن لعيب الكورة أو حتى الكوميديان يكونوا في الصفوف الأولى للدفاع عن القضايا الإنسانية، ده دور الاعلام، و السبب إن اللي بيحصل غير كده إن الاعلام بيفشل في ده، بل و بيزيد الأمور سوءًا فتتجه الناس للأشخاص الناجحين في مجالهم عشان يغطوا على فشل في مجال مش بتاعهم، و ده أول السكة في إننا بنظلمهم معانا، صلاح لاعب كرة قدم لا يتدخل في السياسة من أول يوم، و لا احتفاله بالكريسماس مش رسالة سياسية، الاحتفال بأي مناسبة ده نشاط انساني بحت و لا يجب مقارنة صورة جنب شجرة كريسماس أو حلويات المولد بوضع علم او رمز للتضامن».

وتابع يوسف قائلًا: « تعزيته في موت ملكة انجلترا هو ايضا فعل إنساني  و ليس سياسي، صلاح أو أي لاعب كرة لو كان بيلعب في دوريات الخليج و لاقدر الله لو  أمير او ملك أو شيخ او حاكم الدولة او الامارة او المحافظة اللي فريقه بيلعب له توفاه الله كان هيكتب تعزية برضة لأن ملكة انجلترا عند الانجليز اللي بيلعب عندهم مكانتها في قلوب ناس كتير جدًا زي مكانة هذا الملك او الامير في قلب شعبه، فده بروتوكول و ليس فعل سياسي». 

«مقارنة فيديو صلاح باللقاء بتاعي هو ظلم بيَن، لأن الكلام مش شغلة صلاح، و لأن طلاقة اللغة مش شغلة صلاح، لا صلاح هيعرف يتكلم و يحاور زيي و لا أنا اقدر ألعب كورة زي صلاح، يا جدعان ده انا أكبر انجازاتي الكروية اني عملت تلات عمليات غضروف و أنا عندي ركبتين اتنين بس، ده أنا خدت كباري بعدد شعر راسي، و لو على اللغة، صلاح اللي ما دخلش مدارس لغات زيي بيتكلم إيطالي،أنا معرفش كلمتين ايطالي على بعض».

«صلاح بالانجليزي المكسر و الأداء “الفلات” أو المخطوف زي ما ناس وصفته، الأداء “الوحش” ده عمل ملايين التفاعلات و المشاهدات، كونه بقى أن الكلام مايع ، مفيش إدانة واضحة، مسك العصاية من النص، قصف الجبهات مش دور صلاح خالص، و أصلا هو فيديو غير موجه لينا، و رب فيديو بسيط من غير عياط و من غير نرفزة و من غير شتيمة و من غير ادانات و شجب و عياط و دموع لكن يوصل برة و يغير صوت واحد ده ابرك بكتير».

وأضاف باسم يوسف: «واحد زي صلاح، ملهم لأجيال كتيرة قصة كفاح غير مسبوقة، رجل بيتبرع في السر اكتر من العلن، فاتح بيوت انا و انتم مش عارفين عددها، واحد زي ده نخسره ليه؟

 عشان ما شفاش غليلك في قضية بقالها ييجي ميت سنة أعتى الأنظمة و أكبر الدول فشلوا فيها؟

 أتأخر ياسيدي المهم أنه وصل، مش قوي بما فيه الكفاية؟، اه بالنسبة لك، لكن بالنسبة لناس كتيرة قوي قوي قوي دي ممكن يكون أول مرة يسمعوا فيها عن القضية، الدنيا برة غير خالص الوطن العربي عندنا بس ده له بوست لوحده، فاكرين لما صلاح نزل صورته في القدس و كتب تضامن؟ إتشتم برضة، طيب لما يبقى عندنا واحد بوزن صلاح و كل شوية نشتمه عشان ماعملش اللي احنا عشمانين فيه، طيب على الأقل لو ما شجعناش صلاح مش لازم ندوس عليه، صلاح مش المفروض يكون هو هدف لغضبك».

«انا مريت بالفترة دي ساكت ليه، ما تعمل زي فلان ما تقول زي علان؟ كل واحد و ظروفه و حساباته، لا يكلف الله نفسًا الا وسعها، كل واحد أدرى بالضغوط اللي عليه، بلاش نكون احنا كمان سبب زيادة في الضغط عليه». 

وأختتم يوسف المنشور قائلًا: «في الآخر كل واحد و رأيه، كل واحد يحب و يكره اللي هو عايزه، لو حبيت صلاح او كرهته انت حر، البوست ده مش هيغير حاجة، و دي صورتي مع فخر العرب ، محمد صلاح».