تامر حسنى يدعو متابعيه لدعم قضية فلسطين.. وعمرو خالد يرد

في ظل الأحداث الجارية في دولة فلسطين، وما تتعرض له من اعتداء وظلم تزعزع إيمان بعض الشعوب المتضامنة مع قضية فلسطين، انتشرت منشورات على مواقع التواصل الاجتماعي تتضمن تساؤلًا: أين الله مما يحدث في فلسطين؟.

أنهى الفنان تامر حسني هذا الجدل من خلال منشور عبر حسابه الرسمي، على موقع تبادل الصور والفيديوهات «إنستجرام»، بإجابة منطقية ومرضية إلى حد كبير.

حيث نشر تامر حسني عبر إنستجرام منشور قائلًا: «في الوقت ده ناس كتير إيمانها بربنا ممكن يتزعزع أو ينهار ويقولوا طب ربنا فين، مش هرد بالآيات والأحاديث عشان في ناس أحق مني يتكلموا بلغة الدين، بس أنا هرد رد بسيط من واقع الدنيا، أنت لو دخلت فيلم وجالك تليفون فا استعجلت ومشيت في ربعه الأولاني هل تقدر تحكم على نهاية الفيلم أكيد لأ، يعني ما تحكمش على حاجة لسه خلصانة طب الدنيا لسه شغالة مخلصتش يعني متعرفش بكرة ربنا شايل أيه، ماتستعجلش وتحكم على الدنيا وأنت لسه مشوفتش مرحلة النصر اللي ربنا وعد بيها أصلًا في قرآنه، متحكمش دلوقتي حكمك هيكون غلط احنا لسه مكملناش الدنيا للآخر».

وأضاف: «يمهل ولا يهمل، واللي راحوا دول جريوا على الجنة اللي هي الحياة الأساسية حياة الخلد، راحوا دار الحق ومشيوا من دار الباطل يا جماعة، الدنيا دي ولا حاجة دي دار باطل فيها الشر والكره والحقد والظلم، لكن الناس دي راحت لحياة كلها حب وخير وسلام وفرح، ولما في الآخرة نشوف كل حد كانت حياته صعبة ومليانة معاناة ازاي ربنا كافئه على صبره وتحمله من كل اللي شافه وكرمه بأجمل نعيم الجنة، هنقول ياريتنا كنا احنا».

وتابع طالبًا من متابعيه الصبر على هذا البلاء قائلًا: «الصبر يا جماعة والثقة في وعد ربنا، الدنيا دلوقتي وسكان الأرض انقسمت 2، ناس إيمانهم راح وناس تمسكوا بعقيدتهم أكتر ودول أول ناس كسبوا معركة الدنيا، ثقوا في كاتب الدنيا العظيم أنكم لازم هتسقفوا في النهاية من حلاوة نصره، وهو بينصر المظلوم بمعجزة من عنده تتحقق في الوقت المناسب اللي يعلمه هو، مش احنا والله والله والله لازم يبقى معندناش شك نهائي في رحمته وفضله، اكسبوا المعركة يا جماعة أوعوا إيمانكم بربنا يتهز احنا كلنا أصلًا عايشين في اختبار ولازم ننجح فيه، ان شاء الله هتشوفوا بعينكم أكبر رد من ربنا كما وعد في قرآنه الكريم، ثقوا في الله ان وعد الله حق».

تفاعل الداعية الإسلامي «عمرو خالد» مع منشور حسني، بإعادة نشره عبر حسابه الرسمي على موقع تبادل الصور والفيديوهات «إنستجرام»، وعلق: «كلام جميل يا تامر يا حبيبي ربنا يرضى عنك ويكرمك».

وتبادلا حسني وعمرو خالد المديح ليرد عليه قائلًا: «الداعية الكبير دكتور عمرو خالد يحس كلامي وينشره الحقيقة ده شرف كبير أوي أوي ليا، ربنا يخليك لينا يا دكتور عمرو يا حبيب الملايين، وأنا اللي بشكرك على دعائك الصادق اللي حرك قلوبنا كلنا».

وهي ليست المرة الأولى التي يشيد فيها الداعية عمرو خالد بتوعية تامر حسني لمتابعيه بأمور دينية، باعتباره أحد المؤثرين في الوطن العربي، وخاصةً أنه يتخذه قدوة ومثل أعلى بأسلوبه السلس والبسيط في نشر تعاليم الدين الإسلامي.