إسعاد يونس: 6 أكتوبر حلم تحقق في عيني

حلت الإعلامية الكبيرة إسعاد يونس ضيفة في الندوة التثقيفية للقوات المسلحة بمناسبة مرور 50 عامًا على نصر أكتوبر المجيد، وألقت كلمتها المؤثرة عن ذكرياتها مع حرب أكتوبر المجيد.

قالت إسعاد يونس خلال الندوة: «أنا مش هقول مساء الفل، أنا هقول يا مساء النصر والعزة والكرامة، سألوني أنتي كمواطنه كنتي فين في 6 أكتوبر 73، وده سؤال خبيث من حد عايزني أقر إني كنت موجودة في الوقت ده، اسمحوا لي اعترف إني أنا بنت ضابط طيار حربي، وكنت بقوله دايمًا قمر الزمان».

وأضافت: «والدي قمر الزمان كان بيمثل لي كل معاني الفروسية، الأمانه، الاخلاص، وده كان مُلخص للمؤسسة اللي هو بينتمي ليها، والدي اتوفى سنة 1965 وهو شاب صغير، ومن وقتها وفيه حلم في دماغي هو أني أكون موجودة في مكان واشوف بابا وأقول بابا جه لأن كلمة «بابا جه» كان ليها فرحة عشان كان بيسافر، بس حتى لو مسافر كان بيونسني أنه موجود على مخدتي وأسمع صوت نفسه وأنا فعلًا كنت بسمعه وهو مش موجود، لكن نفسه اللي اتعودت عليه ماكانش مرتاح سنة 65».

وتابعت يونس: «أنا بقي يوم 6 أكتوبر 1973، كنت في مكان مهم جدًا هو إذاعة الشرق الأوسط، وطبعًا ده كان يوم 10 رمضان، وكان بقالنا 9 أيام بنذيع برامجنا عادي جدًا، لكن يوم 6 أكتوبر10 رمضان جالنا بيان عسكري رج المبني زلزال سعيد من الزغاريد والفرحة، بيانات وبرامج بتتغير، كنت اهم واحده في اليوم ده أنا كنت اهم واحدة مش عشان مهمة، لا عشان كنت مرمطون الإذاعة بعمل كل حاجه اطلعي وانزلي».

وأردفت يونس: «كل النجوم موجودين وردة، بليغ حمدي، عبدالحليم حافظ، محمد حمزة، عبدالرحيم منصور، كل الناس دول وصلوا جري من غير استدعاء، لا وصلوا عشان يعكسوا فرحة النصر للشعب المصري، الكل شغال بحب بحماس بشغف بفخر بالانتصار، خبر عظيم، وانا ببص على النجوم دول الفن اللي طلع منهم وعايش لغاية النهاردة كان وليد اللحظة وماكنش مترتب له، فن تم انتظاره لمدة 6 سنين عبروا عن فرحة الشعب المصري كله».