فن

بسبب أزمة ميدو عادل.. لقاء سويدان: الموضوع ليه فترة ومازال قيد التحقيق

لقاء سويدان

رحاب عنتر

A A

خرجت الفنانة لقاء سويدان عن صمتها بعد تصدرها محركات البحث جوجل، بسبب صفعها للفنان ميدو عادل وهجوم المؤلف السيد إبراهيم عليها، وأنها تعمدت إثارة الجدل والتشويش على نجاح مسرحية «سيد درويش».

فيديو لقاء سويدان

نشرت سويدان فيديو لها عبر حسابها الرسمي على موقع تبادل الصور والفيديوهات «إنستجرام»، وقالت: «أنا مش عايزة أطلع أرد، رغم إني بتهاجم في برامج، المهاجمة دي ليه؟ ، لأن بيتصلوا بيا في التليفون أو أعمل مداخلة هاتفية، عشان أرد، هل أنا المفروض أجي برنامج انا عارفة أنه هيكون فيه هجوم، والمشكلة هتكبر وهنفضل نتبادل وأنا أشتم حتى لو فيه خلاف بيني وبين زميل أنا مش هطلع أشتم في برنامج، أو أعمل مداخلة هاتفية أشتم فيه، يعني دي مش أخلاقي وأنا أرفض أطلع في برنامج هياخدني لخلاف أكبر من الخلاف الموجود وأرفض وأتشتم، مفيش مشكلة ياما ناس نجوم أكبر مني اتشتموا واتظلموا».

وأردفت: «أنا مش هقول بالضبط إيه اللي حصل مش هقول كده غير قدام جهات تحقيق، الموضوع مش من أول إمبارح المشكلة من يوم 26 أغسطس وأنا مقدمة مذكرة، مش عشان حاجات حصلت في حقي بس عشان تجاوزات كتيرة حصلت، وأنا أتربيت في المسرح من طفلة صغيرة، أنا نزلت أشتغلت مع أحمد زكي وسعاد حسني سنة 1984».

View this post on Instagram

A post shared by لقاء سويدان (@lekaa_swidan)

وردًا على انتقادات الجمهور لها وتعليقهم بأنها كبيرة في السن قالت سويدان: «على فكرة أنا عندي 49 سنة وفعلًا أنا كبيرة، أنا مش متضايقة من سني الحمدلله، ومبسوطة وأنا كبيرة كده ربنا مديني صحة ومديني شكل كده، واللي بيدخلوا من صفحات يشتموني ويهاجموني المشكلة دي مشكلة شغل، لما حضراتكم تخوضوا في حياتي الشخصية، وسهل جدًا تعملوا لجان إلكترونية تشتموني من خلالها وأنا مش هرد عليكم».

وتابعت: «بالنسبة للناس اللي بتشتم فيا شكرًا ليكم جدًا، أنا مش بهتم بالكلام ولا الصفحات المفبركة، اللي عارفني أنا من زمان بمثل واللي بيحبني هيعرفني على حقيقتي، مفيش حد الناس اجتمعت على حبه، الأنبياء والرسل ولله المثل الأعلى اتشتموا، معنديش كلام كتير أقدر أقوله، لأن الموضوع قيد التحقيق وفيه فيديوهات مصورة، وفيه صور وكاميرات مراقبة رصدت الواقعة، أصبروا شويه مفيش داعي من أنكم تكبروا الموضوع، المشكلة كانت على طريقة شغل وإعتراض على حاجات، أعتقد من حقي أنا ست محترمة وبحترم نفسي وبحترم كرامتي، وكرامتي عندي أهم حاجة وأنا أتربيت في بيت محترم على كده، أني أنا أحترم الكبير عمري ما أتخطيت حدودي ولا أهانت حد كبير».