حمزة نمرة يهدي أغنيته «مرايات» لوالده

أهدى الفنان حمزة نمرة أغنيته الجديدة «مرايات» إلى روح والده الراحل، حيث نشر صورة قديمة تجمعهما سويًا، عبر حسابه الرسمي على موقع التواصل الاجتماعي «فيسبوك».

وعلق نمرة على الصورة معبرًا عن اشتياقه لوالده وكتب قائلًا: «أنا فاكر الصورة دي، كانت في عيد ميلادي وبابا الله يرحمه كان جايب لي هدية، أنا كنت عايز الموقف يعدي بسرعة ومحرج واخواتي بيصوروني وبابا بيديني الهدية وهو حاضنني، لما شوفت الصورة دلوقتي لقيتني بقول لنفسي ياريتك كنت مركز أكتر من كده في اللحظة دي وعرفت تعبر عن المحبة اللي جواك للي حواليك».

وأضاف حمزة في منشوره: «بابا كان من صغره فنان وبيحب الرسم، كان نفسه يطلع رسام، لما خلص ثانوية عامة مجموعه كان يدخله كلية طب القاهرة، لكن هو كان عايز يدخل فنون جميلة.. كل عيلته وقفوا ضده وأقنعوه إن القرار الصح إنه يدخل طب ويأجل الفن شوية لحد ما يخلّص، طبعًا اتخرج من الطب وما دخلش فنون جميلة وسافر واشتغل طبيب أربعين سنة، كان مخلص جدًا لشغله وربنا رزقه نجاح وسمعة طيبة».

حمزة نمرة و والده

وتابع: «وفي مرضه الأخير بابا كان كل اللي بيعمله إنه يصور رسوماته القديمة اللي رسمها وهو صغير وينشرها على الفيسبوك، كأنه بيقول اعرفوني، ده أنا، مش الشخص اللي عرفتوه الأربعين سنة اللي فاتت، أغنية مرايات.. بأهديها ليك يا بابا».

أحدث أغاني حمزة نمرة

يُذكر أن حمزة نمرة يعيش حالة من الانتعاشة الفنية، حيث طرح في شهر يوليو أولى أغنيات ألبومه بعنوان «رايق»، وكان نمرة يطرح أغنية جديدة من ألبومه رايق كل أسبوع وبشكل منتظم.

وتعاون حمزة نمرة خلال الألبوم مع نخبة من الشعراء، من بينهم عمر طاهر ومحمود فاروق ومحمد السيد وحسام سعيد، بينما تشمل قائمة الموزعين الموسيقيين كل من كريم عبد الوهاب وعمرو الخضري والكندي اندري مينا والموزع اليوناني أبوستليس مالياس بجانب الملحن عمرو الشاذلي، وتم تصوير كليباته بين اليونان وبريطانيا.