«بعدما وصفه برقم 19»، رامي صبري يرد على ويجز بهذه الطريقة

تعرض المطرب رامي صبري، لانتقادات واسعة من مغني الراب ويجز، عقب التصريحات التي أدلها بها الأول أثناء حلوله ضيفًا في أحد البرامج التلفزيونية.

وقرر رامي صبري، الخروج عن صمته إذ رد على تلك الانتقادات، عبر صفحته الرسمية على موقع التواصل الاجتماعي “فيسبوك”، ونشر صورة من قائمة المطربين المتصدرين على منصة أنغامي، وعلق عليها قائلًا: "رامي صبري رقم  2 في الـ Arabic Artists Top وTop Egyptian Pop Artists على تطبيق أنغامي".

وسبق وردت شيرين عادل زوجة رامي صبري، على انتقادات ويجز لزوجها، عبر حسابها الشخصي على موقع تبادل الصور والفيديوهات الشهير "إنستجرام".

وكتبت شيرين عادل، قائلة: "ده جزء من الحلقة اللى رامى اتكلم فيها عن الراب، ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني".

وتابعت شيرين عادل قائلة :"أولًا رامي اتسأل سؤال في برنامج ورد وعنده كل الصلاحية لأى رد أو إجابة على أي سؤال، يعني مفيش أي مانع يخلي رامي لما يتسأل سؤال ميجاوبش، وثانيًا رامي صبري ده يا حضرت فنان من أهم الفنانين في الوطن العربي ومن أهم الأصوات ده لو حضرتك مش معانا في مجال المزيكا وبعدين والله يا ريت رامي عنده الوقت بتاع حضرتك الفاضي أوى بتاع 5 شهور فاضي يا ريت كنا نتمنى".

وأضافت شيرين عادل قائلة :"أما بقى موضوع رامي رقم كام ده، هو الحقيقة مش شاغل بال رامى أوي، بس لو حضرتك شايف إن رامي رقم ١٩ مع الأسف الشديد لازم أقول لحضرتك تبقى أنت مش موجود على الخريطة من الأساس".

وأردفت شيرين عادل قائلة :"أغنية واحدة من رامى صبرى، واحدة بس تعمل تاريخ لناس، محتاج تذاكر كويس وتعرف أنت بتتكلم عن مين، قبل ما تتكلم لأنك واضح إنك عندك شغل تانى غير المزيكا لأنك لو جوة الشغلانة كنت مش هتقول ولا كلمة من الكلام ده، علشان الناس متضحكش عليك لأنك اتكلمت عن فنان بجد مش جاي يهزر".

واختتمت شيرين عادل، قائلة: "أخيرًا لما تحب تعمل دعاية لأغنيتك الجديدة ابعد عن اسم رامي صبري أنا عارفة إن اسمه ممكن يخلى الأغنية ترند بس حاول الأغنية بتاعتك الجديدة تعتمد فيها على نفسك".

ويجز لـ رامي صبري: أنت مش رقم 2 يا رامي أنت رقم 19 مثلًا

وكان ويجز، قد ظهر خلال مقطع فيديو، عبر حسابه على “إنستجرام”، قال خلاله: "الفنان دا اسمه رامي، كل 5 أو 6 شهور لما يزهق يطلع على التليفزيون يتكلم على بتوع الراب، طيب هتتكلم أمتى على البوب اللي أنت منهم؟ هتتكلم على فنك ومجالك أمتى".

وتابع ويجز، قائلًا: "أنا شايف أنك مابتفهمش في الراب حاجة ولا بتفهم الكلام بتاعه زي ما أنت قولت قبل كدا فمش هتعرف تعمله".

واستكمل ويجز هجومه قائلًا: "أنا مثلا لو لقيت واحد بيعرف يسوق عجلة وأنا مبعرفش بحترمه عشان هو عمل حاجة غير اللي أنا عملتها، هو أكيد اشتغل على نفسه في حاجة أنا ماشتغلتش على نفسي فيها"

وأردف ويجز، قائلًا: "أنت مابتقدرش الفنانين أنت شايفهم بيحاولوا يوصلوا للمستوى اللي أنت فيه مع إنهم معدينك بكتير".

واختتم ويجز هجومه، قائلًا: "أنت مش رقم 2 يا رامي أنت رقم 19 مثلًا، أنت بعيد أوي يعني".