حفيدة إسماعيل ياسين تكشف تفاصيل لحظاته الأخيرة

كشفت سارة ياسين، حفيدة الفنان الراحل إسماعيل ياسين، عن اللحظات الأخيرة في حياة «أبو ضحكة جنان» في الذكرى الـ 111 لميلاده، معلنة عن معاناته من اكتئاب في آخر أيامه بسبب تجاهل المنتجين له، وعدم تلقيه أعمال جديدة.

وقالت «سارة» لـ «الجمهور»: «اللي حصل إن إسماعيل ياسين كان مستاء جدًا لتجاهل المنتجين له، وكانت نفسيته تعبانة وده اللي وضحه مسلسل إسماعيل ياسين اللي كتبه والدي».

معاناة إسماعيل ياسين من الاكتئاب

وأضافت: «كان عنده اكتئاب في أواخر أيامه فقد وصل به الحال إنه رجع تاني يغني في التياتروهات والملاهي الليلية.. فكان مضايق جدًا للحال اللي وصله بعد ما كان نجم شباك».

وأردفت: «وفضل 10 أيام في الإسكندرية.. خاصة كمان إن أصدقاء عمره فطين عبدالوهاب وأبو السعود الإبياري ماتوا ومكنش ليه حد ولا صديق يتكلم معاه.. وهو لما كان بيضايق بيحب يروح إسكندرية.. ويقعد هناك لوحده مش عشان مثلًا مضايق من أهل بيته أو حاجة.. هي ديه العزلة بتاعته.. بيحب يرجع يفكر يهدى ويعمل انتعاشة من أول وجديد».

تفاصيل اللحظات الأخيرة من حياة إسماعيل ياسين

وروت تفاصيل الليلة الأخيرة في حياة إسماعيل ياسين قبل وفاته، قائلة: «بعدما قعد في الإسكندرية لمدة 10 أيام رجع بيته عادي ووالدي كان عنده امتحان تاني يوم في معهد السينما، وكان بيذاكر معاه مدحت السباعي وقعدين في أوضته، مرة واحدة طنط ميرفت بنت خاله والدي اللي اتبناها إسماعيل ياسين، ووالدة أيمن بهجت قمر، وجدتي نادوا لوالدي وقالوا له ألحق إسماعيل ياسين تعبان وحاسس بضيق تنفس».

وتابعت: «وكانوا وقتها قعدين في شقة الزمالك في الدور الأرضي وفتحوا الشباك والباب عشان يعرف ياخد نفسه، وابتدى بقى يتعب لدرجة إن والدي جري بسرعة ينادي الدكتور عشان ينقذوه ، لكنه رجع لقى باباه اتوفى في ساعتها، وهي كانت أزمة قلبية أنهت حياته نتيجة ضغوط الحياة اللى كان عايشها فى أيامه الأخيرة».