أحمد العوضي يرفع قيمة جائزة مسابقته إلى 150 ألف جنيه

نشر الفنان أحمد العوضي فيديو عبر حسابه الرسمي على موقع التواصل الاجتماعي «فيسبوك»، يسأل جمهوره عن هدايا المسابقة التي أعلن عنها من قبل.

فيديو أحمد العوضي

وقال: «مساء الفل على كل إخواتي الجدعان، النهارده آخر اليوم في المسابقة، النهاردة هنختار الفائزين مع بعض، مش عايز حد يزعل بالله عليكم إنه ماكسبش، أنا لو عليا أكسب الناس كلها بس ما أعرفش، ومش عايز حد يتضايق ومش عايز حد يكون حاطط أمل إنه يكسب وما كسبش، بجد أنا مبسوط بالمصداقية اللي بيني وبينكم، أنا ماكنتش متوقع حجم تفاعلكم والتعليقات دي، أد ما اتبسطت من التفاعل أد ما اتضايقت إني مش قادر أكسب كل الناس اللي علقت».

فلوسي بسببكم

وقدم العوضي اقتراحا آخر وقال: «أنا عندي اقتراح تاني، أنا كنت قلت أنه 4 يكسبوا كل واحد يكسب 25 ألف جنيه، إيه رأيكم لو زودت العدد لـ 10 أفراد وكل واحد يكسب 15 ألف جنيه، هل ده أحسن ولا نعمل المكافأة القديمة؟، أنا حابب أزود اللي هيكسبوا أكون رضيت 10 بدل 4 هستنى رأيكم في التعليقات إيه اللي يرضيكم ، اللي هتقولوه أنا هعمله، أنا عملت المسابقة عشان أبسطكم زي ما بتبسطوني بدعمكم أنتوا شركاء في نجاحي وفي أي حاجة أنا وصلت لها، والسبب في أي حاجة حلوة بتحصلي، أنا لو معايا شوية فلوس ده بسبب حبكم ليا، ودي مش صدقة الصدقة بتكون في الخفا دي هدية مني لأخواتي، المسابقة لأخواتي الشقيانين الجدعان، ربنا يراضيني ويراضيكم، وهختار عشوائي مش شرط تكون علقت أول واحد هختار حتى من الناس اللي علقت متأخر، بحبكم وبعشقكم».

وتفاعل الجمهور بشكل كبير على منشور المسابقة، وعلق أحدهم وقال: «انت راجل محترم وأنا بحبك في الله المتواضع ابن الأصول نجم نجوم مصر والعالم إن شاء الله».

وأضاف آخر: «انا بصراحه ما علقتش عشان ما بحبش الحاجات ديت علي شأن بتكون كدب بالباطل على الناس بس بصراحه لما سمعت الفيديو بتاعك عجبني واستريحت لك جامد وعرفت انك ابن حلال وابن اصول من كلامك وربنا يسعدك ويوفقك ويصلح حالك ان شاء الله ي محترم ودايما مع الغلابه على الله التساهيل، كل الدعم ي عوضي».

مسابقة أحمد العوضي

يُشار أنه أعلن العوضي عن مسابقة لمتابعيه، على مواقع التواصل الاجتماعي بالسؤال عن أهم أعماله الفنية الأخيرة.

حيث كتب منشورًا على حسابه الشخصي على موقع التواصل الاجتماعي «فيسبوك» يعلن فيه عن مسابقة لمتابعيه وكتب قائلًا: «جايه معايا النهارده افرح اخواتي واراضيهم زي ما هما مراضييني بحبهم، هسأل سؤال، هختار أربعة إجابتهم صح ويكسبوا ١٠٠ ألف جنيه كل واحد ربع عمود ( ٢٥ ألفا )».

وكان السؤال: «أشهر ٣ كلمات ( للخديوي ) وأشهر كلمتين ( للكوماندا)»؟

وأضاف: «هلم الورق بعد بكرة وهختار أربعة عشوائي، عالعهد دايما أنا وإخواتي الشقيانين الجدعان».