"بلاش تتجوزوا يا شباب".. عبارة وصلت الفنان محمد التاجي للنائب العام

ضجة كبرة على السوشيال ميديا، حصلت خلال الساعات اللي فاتت، سببها تصريحات الفنان الكبير "محمد التاجي"، اللي له جمهور كبير في مصر والوطن العربي.

الفنان "محمد التاجي"، بقاله فترة غايب عن المشهد، لكن لما رجع، قال تصريحات صحفية سببت جدل كبير، على كل مواقع التواصل الاجتماعي، استدعت تقديم عدة بلاغات ضده للنائب العام، المستشار محمد شوقي عياد.

الحكاية تتلخص، في إن الفنان "محمد التاجي"، كان في ندوة، اتسأل فيها عدة أسئلة، عن زواج الشباب، فكانت ردوده صادمة للجمهور، وقال فيها للشباب: "متتجوزوش يا شباب، ولو عملتوا حاجة فيها قلة أدب، ربنا هيغفر لكم، لأن قوانين المرأة مش هترحم حد".

الفنان مقالش كدة وخلاص، لاء، ده قال كمان ضمن تصريحاته الغريبة، إن عدد كبير من الشباب، بيلجأ للعلاقات المحرمة، كبديل للزواج لأنهم معذورين، ولأن الظروف صعبة عليهم، ومانعاهم يتجوزوا، علشان كدة مش لازم يتجوزوا.

التصريحات دي، بعدما اتقالت على لسان الفنان محمد التاجي، السوشيال ميديا نقلتها في كل مكان وبعدها اتعرض الفنان محمد التاجي، لهجوم كبير من الجمهور، لكن الغريب لما طلع بعدها على الشاشة علشان يوضح موقفه، الناس كانت فاكرة، إنه هينفي كل الكلام اللي قاله، لكن حصل العكس.

قال "التاجي" في مداخلة هاتفية ببرنامج "أحلام مواطن" على قناة صدى البلد، إنه مش هيتراجع عن أي كلمة قالها، ومتمسك بوجهة نظره، وقال إنه لسة عند نصيحته للشباب بعدم الزواج، لأن قانون المرأة مش هيرحمهم.

ووضح أكتر "محمد التاجي" وقال، إن القانون بيوفر للمرأة في الوقت الحالي رفع 15 قضية على طليقها لو حصل انفصال، أما الرجل فملوش فرصة إنه رفع قضية واحدة عليها، ودي حاجة هتصَعب الأمور أكتر على الرجالة.

تصريحات الفنان "محمد التاجي"، عملت ضجة مش بس على وسائل التواصل الاجتماعي، ده كمان استدعت بعض المحامين لتقديم بلاغات للنائب العام، ومنهم المحامي "أيمن محفوظ"، اللي قدم بلاغ، اتهم فيه الفنان "محمد التاجي"، بتشجيع الشباب على الفسق، وتهديد السلم الاجتماعي، وعدم احترام قواعد الدين الإسلامي.

"موقع الجمهور"، حصل على صورة من بلاغ "أيمن محفوظ، اللي قال فيه، إنه تابع كل كلمة قال المشكو في حقه، واللي شجع من خلالها الشباب على الدخول في "علاقات محرمة" بدل الزواج، ودي اعتبرها البلاغ "مخالفة صريحة" لقواعد الشريعة الإسلامية، وللقانون اللي نظم قواعد الزواج.

"محفوظ" في البلاغ، قال أن "محمد التاجي"، عضو نقابة المهن التمثيلية، وفنان كبير، يعني كلامه لازم يكون بعناية ومدروس، لكن لما يحرض على عدم الزواج اللي ربنا أمرنا به، وممارسة الرزيلة، وفي الاخر يقول للشباب "إن ربنا غفور رحيم"، يبقى لابد من التحقيق معه، بتهمة التحريض على الفسق.

ومش دي التهمة الوحيدة اللي تضمنها بلاغ النائب العام، لاء، ده في تهم تانية وجهها المحامي للفنان "محمد التاجي"، منها اذدراء الأديان، وتهديد السلم الاجتماعي، ونشر الرزيلة في المجتمع، ده غير إن كلامه مخالف للفطرة الإنسانية، اللي اتولد بها البشر يوم أن خلق الله الحياة.

في كلام تاني جه في البلاغ، وهو إن كلام الفنان "محمد التاجي" بإن قانون المرأة مش بيرحم الرجالة، وإن الست بعد انفصالها، ممكن ترفع 15 قضية على طليقها، في حين الراجل ميقدرش يرفع قضية واحدة، قال صاحب البلاغ، إن الكلام ده غير لائق وفيه تجني على السلطة، لأن الهدف من القانون، هو حماية الشخص الضعيف، أيا كان سواء راجل أو امرأة، من غير انحياز لفئة عن التانية.

المحامي طلب من النائب العام، المستشار "محمد شوقي عياد"، التحقيق مع الفنان "محمد التاجي"، ومنعه من السفر، بتهمة تشجيع الشباب على الانحراف، لمخالفته نصوص الماده 98 والمادة 160 من الدستور

اللي بيحذروا من استغلال الدين في الترويج لأفكار، تقلل من قيمة تعاليم الأديان، وتضر بالسلم المجتمعي للبلاد.