أقوال المتهمين الثاني والثالث في واقعة السحر لمؤمن زكريا: ما حصلش

تنظر محكمة جنح الخليفة التي ستنعقد غداً الثلاثاء، بمجمع محاكم زينهم، محاكمة المتهمين في واقعة فبركة السحر لمؤمن زكريا، وينشر موقع «الجمهور» أقوال المتهمين الثاني والثالث في تحقيقات النيابة العامة.

أقوال المتهم الثاني في تحقيقات النيابة العامة

وجهت النيابة العامة للمتهم الثاني في واقعة السحر لمؤمن زكريا “محمد عمر" قائلة: ما قولك فيما هو منسوب اليك من أنك متهم مع آخرين بإذاعة أخبار وإشاعات كاذبة عمداً بقصد تكدير الأمن العام وإلقاء الرعب بين الناس وإلحاق الضرر بالمصلحة العامة على النحو المبين بالأوراق؟

ليجاوب المتهم قائلاً: محصلش 

فوجهت النيابة سؤالاً آخر للمتهم قائلة: ما هي ظروف ضبطك وعرضك علينا، وما الذي حصل تحديداً؟

ليرد المتهم قائلاً: (اللي حصل إن تقريبا يوم الأربعاء اللي قبل اللي فات، روحت أجيب مراتي أمنية من مقابر عائلتها في الإمام الشافعي بالخليفة، ولقيت بن خالها بيحفر عشان يطلع صبارة عند الترب، وهو بيحفر لقى کیس أسود، قطعه وقالي افتح صور فيديو، ده عمل، وأنا ساعتها فتحت كاميرا موبايلي وصورت، ولقيت العمل عبارة عن لفتين ورق مربوطين بسلك، وقماشة رسمة عروسة عليها دبابيس وحاجات كتير، ومكتوب عليها حاجات كتير وصورة، وقالي تعالی نروح نجيب جرادل ميه عشان تبطل العمل، وجاب جردل مياه وملح، وجردل تاني قعد يقرأ عليها شوية قرآن، وقالي صور فيديو، وصورته فيديو وقفلت، وكلمنا ابتسام مرات زيكا فجت هي وزيكا، وساعتها زيكا قال انه يعرف مصطفی این خالة مرات مؤمن زكريا وكلموه، وبعدين قالي أنه هيكلم كابتن مؤمن وبعدين هيكلموا، وبعدها مصطفى جه على القرافة وريناله الحاجة وبعدين قالي إنه تليفوناتهم مقفولة، وأول ما تعرف توصلهم هوصلهم، وبعدها بساعتين كلم زيكا وقالهم انهم في إسكندرية وجايين بعد يومين، وبعد يومين چه کابتن مؤمن ومعاه 4 اشخاص و2 شيوخ، والشيوخ نزلت ابطلت العمل وقروا قرآن، وبعد كدة كابتن مؤمن مشي و عرف الي حصل لواحد صاحبه، أنه كلم صحفي و مقلوش أنه صحفي، وقاله أنه اخو مودی، و عرف الي حصل و نشر من ورا رمضان، ويوم السبت الساعة 7.30 بالليل لاقيته عايزني عند بيته، وروحنا الساعة 10 بالليل مدينة الإنتاج الإعلامي وبعد كدة روحنا القسم ودة إلى حصل.

أقوال المتهمة الثالثة في تحقيقات النيابة العامة

وجهت النيابة العامة للمتهمة الثانية في واقعة السحر لمؤمن زكريا “أمنية" قائلة: ما قولك فيما هو منسوب اليك من أنك متهمة مع آخرين بإذاعة اخبار واشاعات كاذبة عمداً بقصد تكدير الأمن العام وإلقاء الرعب بين الناس وإلحاق الضرر بالمصلحة العامة على النحو المبين بالأوراق؟

لتجيب المتهمة قائلة: محصلش.

فوجهت النيابة سؤالاً آخر للمتهمة قائلة: ما هي ظروف ضبطك وعرضك علينا، وما الذي حصل تحديداً؟

لترد المتهمة قائلة: (اللي حصل إن رمضان ابن خالي تربى في مقابر سيدى عقبة، ومن فترة لقى اعمال سحر وكان تقريبا يوم 14، أو 15/9/2024، في ترب هو مشرف عليها وكانت خاصة بعائلة الكابتن مجدى عبد الغنى، وبعدها كابتن مؤمن زكريا جه هو وشيوخ، وفكوا الأعمال دي، وبعدها رمضان حكى الموضوع ده لصيدلي، والموضوع انتشر في المنطقة، وبعد كده فيه مذيعة عرفت بيه وبعتت مدير أعمالها، وحكيتلها على الموضوع بتاع الأعمال بتاع كابتن مؤمن زكريا، وقلتلها انا ممكن اطلع مع المذيعة واحكى الموضوع بتاع كابتن مؤمن زكريا، مقابل إنى أخد مائة ألف جنيه، وبعدين يوم السبت اللي فات كنت قاعدة انا وباسمة لقينا تليفون باسمة بيرن ردت ولقت رمضان اخوها بيقولها ان هو الحكومة أخدته، وأنهم بيدورو علينا، ساعتها انا وباسمة اتصلنا بمدير أعمال المذيعة، وقلتلها عاوزين نطلع معاكي عشان نبرء نفسنا، وبعدها انا رحت انا وباسمة وجوزى محمد عمر وحكيم، ورحنا على مدينة الإنتاج الإعلامي، وبعدين رحنا القسم يوم السبت الساعة 11.30 بالليل، واتعرضنا النهاردة على النيابة وهو ده كل اللي حصل.

تابع موقع الجمهور من خلال (يوتيوب) اضغط هــــــــــــنا

تابع موقع الجمهور عبر تطبيق (نبض) اضغط هــــــــنا

تابع موقع الجمهور عبر تطبيق (جوجل نيوز) اضغط هــــــــنا

الجمهور، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة المصرية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار، الاقتصاد، حوادث وقضايا، تقارير وحوارات، فن، أخبار الرياضة، شئون دولية، منوعات، علوم وتكنولوجيا، خدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.