«التربي» يكشف مفاجآت في أقواله أمام النيابة في واقعة سحر مؤمن زكريا

تنظر محكمة جنح الخليفة المنعقدة غداً الثلاثاء، بمجمع محاكم زينهم، محاكمة المتهمين في واقعة فبركة السحر لمؤمن زكريا، وينشر موقع «الجمهور» أقوال المتهم الأول “التربي” في تحقيقات النيابة العامة.

أقوال التربي في واقعة السحر لمؤمن زكريا

وجهت النيابة العامة للمتهم الأول في واقعة السحر للاعب كرة القدم مؤمن زكريا سؤالاً قائلة: ما هي ظروف ضبطك وعرضك علينا وما الذي حدث بالتفصيل، ليجيب المتهم قائلاً: (أنا شغال تربى في مقابر سيدى عقبة في الخليفة، واللي حصل أني في يوم كنت بزرع صبارة في الترب، وفجأة وانا بحفر لقيت كيس بلاستيك في الأرض، ولما مسكته وفتحته لقيت فيه لفتين، أول لفة لقيت مكتوب فيها طلاسم وحاجات مش مفهومة، واللفة الثانية بفتحها لقيت فيها ثلاث ورقات مكتوب فيهم كلام مش مفهوم، وفيها صورة اللاعب مؤمن زكريا، والصورة مكتوب عليها بالأحمر كلام مش مفهوم، ومدبس فيها اكثر من دبوس).

وأكمل المتهم قائلاً: (انا صورت الحاجات اللي لاقيتها بتليفون محمد جوز أمنية، واتصلت بمحمد إمام قريبي وقلتله على اللي انا شفته، وهو قالي أنه يعرف حد يوصلني بالكابتن مؤمن زكريا، بعد كده لقيت واحد اسمه مصطفى ومعاه واحد صاحبه وقالي إنه قریب زوجة مؤمن زكريا، وطلب أنه يشوف الأعمال اللي انا شوفتها في المدافن وانا وريتهاله، وقالي انه مرات مؤمن زكريا هتتواصل معايا).

وأكمل المتهم في التحقيقات: ( بعدها بيومين لقيت الكابتن مؤمن زكريا و معاه والده واثنين شيوخ ومصطفى، والشيوخ طلبت منى اجيب الاعمال عشان يشوفوها، وطلبوا مني خل وميه وسلطانية على أساس انهم بيفكوا الأعمال، و بعد كده طلبوا منى انهم يشوفوا المكان اللي ان لقيت فيه الكيس ده، والشيخ طلب منى احفر شوية كمان وطلع ساعتها من الحفرة اللي جنب التربة حنين فخار وسلك، وحط زرعة الصبار وسقاها بمية مقرى عليها قرآن، وبعد ما مشيوا لقيت محمد عمر بيقولى انه صورنا واحنا بنفك العمل، وانا طلبت منه انه يمسح أي حاجة صورها عشان مينفعش نتاجر بمرض حد).

وأضاف المتهم: (تاني يوم وانا رايح اجيب علاج من الصيدلية لقيت الصيدلي بيقولي ايه موضوع مؤمن زكرياده، قولتله انه كان فيه اعمال ليه في الترب وفيه شيخ جه فكها، وقالي انا مصدقك وساعتها رحت طلعتله الصور اللي كنت مصورها للأعمال والدكتور ساعتها طلب مني ان ابعتله الصور، وانا بعتهاله بحسن نية وبعد كده لقيت حد بيتصل بيا وبيقولى انه هو جاري ويسألني على موضوع مؤمن زكريا، وحكلته اللي حصل وبعدها على طول لقيت المكالمة اللى كانت بيني وبين الراجل ده).

واختتم المتهم أقواله: (ويوم السبت اللي فات لقت احمد الكردي رئيس المباحث بيتصل بيا وبيقولى انا عند البيت عندك وعاوزك تجيلي حالا، وفعلا انا رحتله عند البيت وقالى ايه ياعم اللى انتا عامله، قلتله انا معلمتش حاجة وطلب منى انى اوريله مكان الحفرة اللي كان فيها الاعمال، وريتهاله وحيكلته على كل اللى حصل، وبعد كده ركبني ميكروباص وطلعنا على قسم الخليفة، وفي القسم طلعت وحدة المباحث وفضلت قاعد في المباحث لحد النهاردة الفجر، وبعد كده لقيتهم نزلوني الحجز و النهاردة جابوني على النيابة وهو ده كل اللي حصل.

وجهت النيابة سؤالاً آخر للتهم قائلة: متي وأين تم ضبطك تحديداً؟

ليرد المتهم: تم ضبطي يوم السبت اللي فات بتاريخ 28/9/2024 الساعة 8 مساءً عند بيتي في شارع سيدي عقبة بمنطقة الإمام الشافعي في الخليفة.

تابع موقع الجمهور من خلال (يوتيوب) اضغط هــــــــــــنا

تابع موقع الجمهور عبر تطبيق (نبض) اضغط هــــــــنا

تابع موقع الجمهور عبر تطبيق (جوجل نيوز) اضغط هــــــــنا

الجمهور، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة المصرية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار، الاقتصاد، حوادث وقضايا، تقارير وحوارات، فن، أخبار الرياضة، شئون دولية، منوعات، علوم وتكنولوجيا، خدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.