«راح وخد الدراما معاه».. حسن فؤاد يتحدث عن عمار الشريعي

تحدث الفنان حسن فؤاد، عن كواليس لقاؤه بالموسيقار الكبير عمار الشريعي: «بتيجي سيرة عمار الشريعي هنتكلم عن وجدان اسمه عمار الشريعي شكل وجدان مش الوجدان المصري بس، الوجدان العربي، عمار الشريعي ده معنى الدراما الموسيقية، أنا دايما بقول عمار الشريعي راح واخد معاه الدراما.»

وأضاف «فؤاد» خلال تصريحاته مع الإعلامية إنجي هشام، في برنامج المنسي عبر قناة «هي»: مسلسل أرابيسك دا كان بيقراه ورقة ورقة، مين يعمل كده دلوقتي، علشان يشوف «توحيدة» الموسيقى بتاعتها هتكون عاملة ازاي ، وأم حسن وحسن أرابيسك هيعمل إيه، كل دول لازم يعرف شخصياتهم في المسلسل علشان يترجم ده موسيقيا.

وتابع: أول حد اتعرفت عليه كان مأمون الشناوي، كان أول واحد سمعني وآمن بيا، أنا كنت محظوظ جدا، الأستاذ مامون لما سمعنى قدمني لمجدي العمروسي، مجدي العمروسي يعني عبد الحليم، يعني صوت الفن يعني حكاية كبيرة وتاريخ طويل، ومن الأستاذ مجدي العمروسي قابلت بليغ حمدي، كان مبدع وعبقري وقالي هقدمك في أول حفلة، لكن يشاء ربنا أنه يتعب ويتوفى وبعدها اروح للموسيقار كمال الطويل.

واختتم حسن فؤاد قائلا: «قابلت كمال الطويل وشوفته وهو بيلحن وشوفت البني آدم الضخم اللي كان بيتحول لطفل كان بياخدني من أيدي يقولي يلا نلحن، وشوفته وهو عايز يولد جملة لحنية، وحصل خلاف ومشتغلتش معاه، وقولت للأستاذ مجدي العمروسي أنا عايز الموسيقار عمار الشريعي، أنا اللي اخترته، راح قاله فيه صوت هيجيلك روحتله وأنا مذاكر تاريخه وقعدت جمبه 3 سنوات، وأول حاجه عملتها كانت احتفالات أكتوبر، وفي مرة قولتله ما ترشحني في أي تتر مسلسل رمضان جاي قالي هشوف وبعدها اختارني لأرابيسك».

وكشف الفنان حسن فؤاد عن سبب اختفاء مطربي التسعينات واختلاف أذواق الجمهور، قائلًا: «حاجات كتير اوي اختلفت يعني مقدرش أقول إن اللي بيتقدم ده فن شعبي، دايما بقول محدش ضيع المزيكا في مصر غير الفن الشعبي لأنهم فاهمينه غلط، الاطلال دي غنوة شعبية حد يصدق؟ اه شعبية لأن بيسمعها المكوجي، بيسمعها النجار بيسمعها الظابط بيسمعها الوزير لكن الذوق اتغير لانهم فهموا المسألة غلط.»

وأضاف فؤاد: محمد رشدي هيفضل رقم 1 في الغنوة الشعبية هيفضل محمد العزبي رقم 1 هما دول الغنا الشعبي، حد يقول الغنا الشعبي يبقي محمد رشدي، محمد رشدي هز عرش عبد الحليم حافظ، لكن دلوقتي اللي بيتقدم مش غنا شعبي لا شكلا ولا موضوعا مع احترامي لكل اللي بيغنوا شعبي.

وتابع: «مش بسمع مهرجانات غير في الشارع مقدرش لا ذوقي ولا شكلي ولا تربيتي، وأنا ضد أنه يتقال أن الجمهور عاوز كده واكبر دليل أن فترة مسلسل أرابيسك، أن شعبان عبد الرحيم كان طالع، لكن غنوة تطلع وتكسر الدنيا يبقي الجمهور مش عاوز كده، الجمهور عاوز شغل مخدوم كلمات ولحن وأداء ولكن في حاجات بتتفرض عليه، أنا من فترة في فرح مكنتش مصدق اللي أنا سمعوا.»