الفنانة ميران عبد الوارث: دوري في ريڤو جرئ ونفسي أكون زي انجلينا جولي

ردت الفنانة الشابة ميران عبد الوارث ابنة الفنان الراحل أحمد عبد الوارث على تعليقات صلة القرابة بينها وبين الفنان عبد الوارث عسر حيث هاجمه حفيده الفنان محمد التاجي بأنه يستغل تشابه الاسماء بينهما.

وكشفت ميران عبد الوارث لأول مرة خلال استضافتها في برنامج "فيس أوف" والذي تقدمه الإعلامية سارة نخلة على قناة "هي" عن كواليس طلب عبد الوارث عسر من والدها قائلة: "والدي لما ظهر الناس افتكرت ان عبد الوارث عسر باباه بسبب تشابه الاسماء، وبابا طلع في مقابلة وقال لا دا مش والدي واتمنى ان الفنان القدير دا يكون والدي".

وتابعت: "بعدها جاتله مكالمة عبد الوارث عسر وقاله اتمنى ان يكون ليا ابن موهوب ومحترم زيك وبعد اذنك بعد كدة لو حد سألك قول ان انا باباك، فابتدى بعد كدة يقول ان عبد الوارث عسر ابوه".

وعن علاقتها بأسرة عبد الوارث عسر قالت: "استاذ حسين عسر كان مدير تصوير مسلسل كلبش واول ماسلمنا على بعض قالي ازيك يا قريبتي فقولتله كان نفسي والله، واحنا عارفين في الوسط ان احنا مش قرايب بس بنتعامل على اساس كدة".

وكشفت الفنانة الشابة ميران عبد الوارث عن كواليس بداية مشوارها الفني وردود أفعال الجمهور حول دخولها المجال من خلال والدها الفنان الراحل أحمد عبد الوارث قائلة: كان عندي الفرصة أوصل من خلال بابا بس مش دا اللي حصل.

وتابعت ميران عبد الوارث: "كان عندي نوع من العند والاصرار اني اوصل بموهبتي مش بأني بنت فلان والناس متخيلة ان ابناء العاملين هما اللي بيشتغلوا بس عايزة اقولهم ان اللي بيسعى واللي عايز يوصل لحاجة بيوصلها ولما بيتعرف اني بنته دا شئ بيشرفني و بيبقى في نوع من التقدير وبيبصولي بنظرة مختلفة".

كما روت عن رأي والدها في الوسط الفني قبل رحيله قائلة: "بابا مكنش معارض اني امثل ولكن كان عنده شوية تحفظات لأنه فاهم المجال وعارف طبعي وكان دايما بيقولي بخاف انك متعرفيش تتعاملي بس كان شايف اني فيا عناصر الفنانة وكان عايزني اكتشفها لوحدي ودا فعلا حصل".

وعن بداية اكتشافها لموهبتها: "اكتشفت موهبتي في الجامعة في مسرح الجامعة ومكنتش عايزة أمثل في البداية كنت شخص انطوائي وبيتكسف جدا وعمري ماكنت بشوف بابا واحس اني عايزة ابقى زيه".

وكشفت الفنانة الشابة ميران عبد الوارث عن كواليس دورها في مسلسل ريڤو الجزء الثاني والذي قدمت من خلاله شخصية "نور".
قالت ميران عبد الوارث: "دور نور في ريڤو كان جرئ لأنه اي حد بيقدم فعل مش سوي الناس بتتفاعل معاها وبيبقى في نوع من الكره للشخصية بسبب اللي هي بتعمله في الدور".
وأضافت: "كواليس ريفو من نوع تاني عشان فكرة التسعينات وفكرة انك بتعملي زمن تاني مش أسهل حاجة لأنهم مكنوش بيتكلموا بسرعة زينا كان في ايقاع ابطأ فكان في تفاصيل بهتم بيها".
أما عن نوع الاعمال الفنية التي تسعى لتقديمها: "حابة أجرب كل الادوار بس نفسي اقدم دور أكشن لانه شبهي اوي ونفسي اتجه الاتجاه دا وعايزة ابقى زي انجلينا جولي".