ناقدة تفتح النار على «ولاد رزق 3»: «مش هنوصل للعالمية بفيلم زي ده»

أثار فيلم «ولاد رزق 3»، ضجة كبيرة بعد تخطيه الـ 200 مليون جنيه خلال 3 أسابيع في دور العرض السينمائية بمصر، ليزداد التساؤل هل يمكن للسينما المصرية أن تصل إلى مكانة أفلام هوليوود.

وتواصل «الجمهور» مع الناقدة الفنية الكبيرة ماجدة خير الله لتوضح وجهة نظرها ومدى توقعاتها لإمكانية منافسة السينما العالمية مع احتمالية وجود عمل فني كبير يصل بالسينما المصرية إلى العالمية. 

رأي ماجدة خير الله في منافسة السينما المصرية للسينما العالمية 

قالت ماجدة خير الله في تصريح خاص لـ«الجمهور»: «مساهمة السعودية أو هيئة الترفيه بتمويل ولاد رزق حاجة، وفرص وصول السينما المصرية للعالمية حاجة تانية خالص، وكتير من الأفلام المصرية فيه تمويل آخر، بمعنى تمويل من جهات تانية، واشتراك الأفلام في مهرجان ده مبيوصلهاش للعالمية، بس بيديها فرصة الاشتراك في بعض المهرجانات، تنجح أو متنجحش ده موضوع تاني زي فيلم ريش وفيلم يوم الدين وأفلام كتيرة بتتعرض في مهرجانات وهتلاقي الإنتاج فيه تمويل من جهات متعددة». 

وأضافت «أما ولاد رزق فده مسألة محلية جابت إيرادات كتيرة أو قليلة ده مسألة محلية متوصلوش إنه يشترك في أي مهرجانات عالمية، لأنه مجرد فيلم تجاري لطيف وخلاص». 

حلم الوصول للعالمية

وتابعت: «حلم إن أنت توصل للعالمية دي عايزة تفكير تاني وشغل تاني ومستوى تاني، اللي بيحصل ده ميوصلناش لحاجة أبعد من حدودنا إحنا على المستوى المحلي يعني». 

وأوضحت: «مش هيحصل إن يبقى فيه عمل فني مشترك بين نجم مصري وعالمي لأن المسائل مش إنك معاك فلوس وتقدر تجيب ممثل عالمي له قيمة، مش ممثل من اللي يطلعوا يضربوا ويتضربوا وخلاص، ويكون الفيلم نفسه له قيمة تخليه يعرض في المحافل العالمية لأن التفكير نفسه تفكير إنك رايح تعمل فيلم تجاري جيد الصنع ولطيف إنما ده ملوش علاقة بأن أنت تصل للسينما العالمية أو إن يبقى لك مكانة في السينما العالمية، لأن أنت فاكر إنك هتقدر تبهرهم بأفلام فيها عربيات بتتكسر وتتشقلب وناس بتجري ورا بعض وحاجات زي كده». 

وأشارت إلى أن السينما المصرية أو السينما العربية «مفكرتش إنها تغير في منهجها يبقى عليه العوض، والأفلام اللي هيكون ليها اعتبار لازم تكون بتتكلم عن مجتمعنا زي الأفلام الهندي مثلا، وإن السينما الهندي مش اللي الناس متصوراها اللي هو مليان رقص وغناء، بالعكس الفيلم الهندي بيكون قيم جدا وبتتعرض في مهرجانات وليها قيمة، وفيه أفلام هندي وصلت للأوسكار يعني بالرغم إنها مبتحصلش على جوائز بس بتترشح على الأقل، على كل حال علشان يبقى لك وجود على الساحة العالمية كأفلام وكسينما هي مسألة عايزة تخطيط وتفكير ومواهب أخرى وأفكار أخرى غير النجاح التجاري فقط زي ولاد رزق والفيل الأزرق ده مياكلش معاهم خالص».

تابع موقع الجمهور عبر تطبيق (نبض) اضغط هــــــــنا

تابع موقع الجمهور عبر تطبيق (جوجل نيوز) اضغط هــــــــنا

الجمهور، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة المصرية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار، الاقتصاد، حوادث وقضايا، تقارير وحوارات، فن، أخبار الرياضة، شئون دولية، منوعات، علوم وتكنولوجيا، خدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.